رامى زين يكتب : برضوا هتنتخب السيسى!

برضوا هتنتخب السيسى! على الرغم إن المجلس العسكرى اللى كان بيحكم البلد بعد 25 يناير والسيسى كان أحد أعضائه ، وحصلت مصايب فى عهده على سبيل المثال مجزرة مباراة الاهلى والمصرى فى بورسعيد وغيرها وكانت مضيقاك ساعتها إلا أنك دلوقتى نسيتها وهتنتخب السيسى! ، وعلى الرغم من إن مرسى هرب من السجن خلال ثورة يناير وإتصل بالجزيره وأمة لا إله إلا الله عرفت إنه هرب إلا إنه لما راح يقدم أوراق ترشحه للرياسه فى ظل حكم المجلس العسكرى اللى السيسى كان فيه ما إتقبضش عليه لأ ده كمان إترشح وبقى رئيس وهو هربان من السجن يا سبحان الله إلا إنك ما إندهشتش وهتنتخب السيسى ! ، وعلى الرغم من إن اللى هرب مرسى من السجن هما حماس اللى دخلت من الحدود المصريه ووصلت لحد سجن وادى النطرون فتحته وهربت مرسى والإخوان ورجعت تانى فلسطين كل ده أيام ما كان السيسى مدير المخابرات الحربيه وعلى الرغم من كده إنت برضه هتنتخب السيسى !على الرغم من إن مرسى لما مسك كان وعد إنه هيجيب حق اللى ماتوا فبدال ما يحاكم طنطاوى قام جى مكرمه، وطنطاوى إشترط على مرسى إن السيسى يبقى خليفته ومرسى وافق (يعنى صفقه بين المجلس العسكرى اللى السيسى كان فيه والإخوان ) وعلى الرغم من إنك عرفت برضه هتنتخب السيسى ! ، على الرغم من إن المفترض إن مرسى إتشال مش بس عشان ما عملش حاجه خلال السنه اللى حكم فيها لا ده كمان عشان متخابر مع حماس وجماعته عذبت الناس عند قصر الإتحاديه ، وقضية إقتحام السجون وكل ده كان قبل 30 يونيه وعلى الرغم من كل ده السيسى بيقولك إحنا عرضنا على مرسى عمل إستفتاء على شرعيته يعنى السيسى ما كنش عنده مشكله إن مرسى يكمل 3 سنين كمان فى الحكم وهو جاسوس وعليه قضايا أخرى لو كانت نتيجة الإستفتاء جت فى صالح مرسى لأ والأكثر من ذلك أن السيسى فى لقائه مع لبنى عسل ووائل الإبراشى قال إن الإخوان لو كانوا إستجابوا لخارطة طريق 3 يوليه كانوا هيبقوا معانا فى لجنة تعديل الدستور ومن حقهم الترشح فى إنتخابات الرئاسه والبرلمان ،يعنى السيسى كمان مدى الإخوان فرصه تانيه لو كانت نتيجة الإستفتاء على بقاء مرسى ما جتش فى صالحه يعنى إرهابيين وخونه وهيديهم فرصه تانيه لحكم الوطن وعلى الرغم من إنك عرفت ده برضه هتنتخب السيسى ! لحد النهارده عمليات الإرهاب ناجحه بنسبة 98 % والإرهاب واخد الأمن غسيل ومكوى على الرغم من إن السيسى متحمل مسئولية الامن من يوم ما فوضته يوم 26-7 يعنى فشل فى ملف واحد تم إسناده له فما بالك بقية الملفات ، وعلى الرغم من كده هتنتخب السيسى ! ، ضحك عليك لحد ما خلاك ترشحه بدال ما يتقدم هو من نفسه عشان يفضل يتغنى بالجمله اللى عمال يقولها دلوقتى أنا ما إترشحتش انا تم إستدعائى من الشعب وبناء عليه إتكبر على سيادتك وما إحترمكش وما كلفش خاطره يقدم برنامج واضح وصريح وذلك ليس للأمن القومى كما يدعى ولكن حتى لا يتم محاسبته على وعده الإنتخابيه فيخلع منك ساعة الجد وعلى الرغم من كده برضوا هنتنخب السيسى !