رساله لكل بنت بقى عندها قطه الف مبروك انك بقيتى ام

بقلم : دكتور محمود حمدى ( طبيب وجراح بيطرى )

رساله لكل بنت بقى عندها قطه :

اولا الف مبروك انك بقيتى ام .. " متستغربيش "
لان تعاملك مع قطتك الجديده هيبينلك اد ايه انتى ممكن تكونى ام على الحقيقه بالظبط .. 

ام متقرفشى من ابنها الصغير اما يعمل تواليت على نفسه وتبقى فى قمة الفرح وهى بتخطو معاه اول خطوات حياته الجديده تعلمه ازاى يعمل تواليت فى مكانه وتنضفله وهى مش قرفانه ولا منزعجه تماما..

قطتك الصغيره ده زى ابنك لازم شوية صبر ولازم شوية طول بال لازم تاكليها كويس و تنظفيها كويس باستمرار وتعوديها على عمل التواليت فى المكان المخصص ليها وهو الرمل

قطتك محتاجه حنيتك وعطفك عليها محتاجه وقفتك معاها فى فترة تعبها ومرضها
محتاجه انك متتكاسليش عنها وهى تعبانه وتكسلى توديها للدكتور وتديلها الادوية فى مواعيدها ... كل ده بالظبط هتشوفيه مع ابنك لاقدر الله لو تعب

متقوليش ده حيوان وده ابنى لان الروح مش بتتجزا ولا بتفرق بين انسان وحيوان
الروح مخلوق من عند رب الكون ... اتخلقت واتخلق جوه كل انسان الرحمه والرفق به

متضايقيش اما قطتك تيجى تصحيكى فى عز نومك وتسهرك بليل
لان ابنك هيعمل كل ده واكتر بالعكس هتقدرى تتعودى على كده وهتقدرى تاخدى بالك من ابنك اكتر

هتبقى ام ناجحه اوى وهتقدرى تربى ابنك كويس وتاخدى بالك منه
والفضل كل ده هيرجع لقطتك الرقيقه اللى هتساعدك انها تعلمك وتساعدك كمان اما يكون عندك طفل انها تاخد باله منه .. متخفيش مش هتأذيه علشان طول مانتى كنتى حنينه معاها هتكون حنينه مع ابنك جدا .. ممكن تبقى غيرانه شويه بس بحنيتك وعدلك فى الاهتمام بنهم هتحبه جداا

واما قطتك تخلف كيتنز صغيرين هتبقى عامله زى الجده اللى بنتها كبرت وخلفت
هتجرى عليكى تتمسح فيكى وممكن تشدك من هدومك علشان تكونى جمبها تساعديها فى الولاده
ومع اول نزول لاول بيبى وصرخاته وعياطه علشان ياكل هتحسى انك بقيتى جده وبقى ليكى احفاد
هتحسى احساس جميل جدا هيخليكى تحسى بطعم الحياه بجد

عرفتى ليك هتبقى ام ناجحه لو ربيى قطتك كويس ومبخلتيش عليها باى اهتمام او رعايه

مبروك بقيتى ام ناجحه وشاطره جدا