بالصور : بلطجى يهدد رائد بحرى داخل قسم الشرطة .....رغم طلبه استدعاء الشرطة العسكرية

 الأربعاء 10 سبتمبر 2014

ادهم قبل الاصابة

ادهم بعد الاصابه

كتب : شهر زاد الثورة_ محمد اكسجين

يروى رائد بحرى رائد بحرى بالمعاش محمد عيد مأساة من واقع امنى مهترئ أكسجين : ايه اللى حصل معاك ومع ابنك ؟؟ وكيف تعامل معك امناء الشرطة ؟؟ ذهبت انا وأولادى فى يوم الخميس 4/9 الساعة 11 صباحا للفسحة فى ملاهى فى المعمورة فى اسكندرية على غير عادتى لأن يوم الخميس بيكون زحام بس خرجنا علشان تانى يوم كان عيد ميلاد ادهم ابنى فخرجنا نفسحه وحصل الآتى خرج فجأة شخص عبارة عن كتلة من العضلات طوله 175 تقريبا وماسك سيف وفوجئت بالناس بتصرخ وبتجرى قدامه زى الغنم بتتفرق وفى ناس متعورة ووشها بينزف ناس كتير دم وبلطجية وشئ مخيف فى مكان المفروض ان فيه 

اطفال وناس رايحة تتبسط فأخدت المدام والأولاد وخرجنا رحت على الباب وطالبت بتمن التذكرة كإثبات موقف اعتراض على عدم السيطرة على البوابة وازاى سمحوا للناس دى تدخل ومعاهم سلاح وان انا جيت علشان افسح ولادى وملقيتش الخدمة اللى انا عايزها ورفض اللى واقف انه يرد تمن التذكرة وطلب منى ادخل للإدارة ودة طبعا صعب انا ما 

صدقت خرجت بالولاد وفجأة خرج البلطجية دول بسيوفهم وناس بتجرى قدامهم ووشها غرقان دم وكله متعور ابنى اتفزع من المنظر جرى ووقع وحصلت له اصابات وجروح فى وشه وايده اخدته وجريت على المستشفى ورحت اعمل محضر فى القسم قبلها واحنا واقفين جت الشرطة بعد كله ما خلص واختفى البلطجية وجاى امين الشرطة بيزعق زعقت له وقلت له انتوا مقصرين شوف الولد جراله ايه وكنت على وشك انى اتخانق معاه بس قلت الحق الولد واعمل محضر فيهم وفى المسئولين عن الملاهى دى 

المهم رحت نقطة شرطة المعمورة فقلت انا عايز اكلم ظابط مش عايز اتعامل مع امناء شرطة فلقيت ظابط امام القسم قلت له عايز اعمل محضر قالى انا ظابط مرور .. فطلبت من امين الشرطة يشوف لى ظابط علشان اعمل المحضر والمذهل ان مكان زى المعمورة فى يوم زحام زى كدة وميكونش فيه ظابط ... ورد عليا وقالى مفيش هنا ظباط لأن دى نقطة مفيش غير اتنين امناء شرطة بس
قالى انت هتعمل محضر ايه قلت له انا كنت فى الملاهى وحصل كذا كذا قالى بطاقتك فطلعت له كارنيه القوات المسلحة وكارنيه المحاربين القدامى والبطاقة وحطهم قدامه فى دخلة الإتنين امناء الشرطة اللى كانوا عند الملاهى جايبين معاهم البلطجى اللى كان عامل الأزمة دى أكسجين : كان اتقبض عليه وكدة ؟؟ لا مش قبض عليه دة البلطجى خبى السيف بتاعه فى أى حتة ودخل الملاهى تانى ولقيت ان هذا البلطجى هو احد الجاردات اللى شغالين فى هذا المكان فدة احد جاردات دزنى لاند بتاعتنا وأول ما دخل قاله اقعد يا عاشور للبلطجى انت عامل مشاكل ليه ..فأنا بصيت له وقلت له عامل مشاكل ؟1.. الجرايم دى انت بتسميها كدة عامل مشاكل قالى متكلموش ومتوجهش كلام لحد غير فى دورك فسكت واستمرارا لهذه التمثيلية الجميلة عاشور قعد طبعا زى زيه ......طبعا هو كان داخل مع الناس اللى كان بيتخانق معاهم فالبلطجة ناتجة عن مشاجرة أكسجين : انت عرفت المشاجرة دى سببها ايه ؟؟
المشاجرة دى سببها ان اخو هذا البلطجى كان واقف عن الملاهى شاف بنت عجبته قام معاكسها واتحرش بيها حظه ان البنت جاية مع فوج صعايدة جايين الملاهى من اسيوط ابوها كان واقف جنبها لقى دة بيعاكسها قام سحب عليه الطبنجة أكسجين : والأمن فى الملاهى سمح له يدخل بطبنجة كدة ؟؟ الله يفتح عليك اللى جاى يتفسح يدخل بسلاح ليه .. فلما سحب الطبنجة عليه جرى ونادى اخوه البلطجى عاشور وهو ميقلش عن 30 سنة وجسمه متشرح سيوف ومطاوى وجسمه كله عبارة عن علامات بلطجة لدرجة انا بقولهم الواد مدبوح قبل كدة ولا ايه لأن رقبته عليها علامة سيف فجه عاشور وعاه البلطجية ومسكوا الفوج دة ازاى يرفعوا 

الطبنجة على اخوه وراحوا مخلصين فيهم ضرب وكدة وطبعا لما جم القسم هو والناس اللى كان بيتخانق معاهم الراجل قال مفيش معايا طبنجة وانا شنطتى اتسرقت وكان فيها فلوس مكنش فيها طبنجة فالقضية بقت بين الإتنين تبادل اتهامات عاشور بيتهمه برفع سلاح نارى والصعيدى بيتهمه بالتحرش ببنته وضربهم ورفع عليهم سلاح ابيض انا بصيت لعاشور قلت له انت تعرفنى قالى لأ قلت له انا أعرفك قال لأ قلت له فى بينى وبينك حاجة قال لأ .فبصيت لأمين الشرطة وقلت له انا بتهم الشخص دة بالإرهاب وترويع الآمنين وأنه مينفعش يتواجد فى مكان الناس بتتفسح فيه ويكون معاه سلاح ويعمل اللى عمله دة ... فلقيت البلطجى بينادى امين الشرطة باسمه كأنهم اصحاب وبيقوله اعمل محضر ليا كمان بتهم دة عليا وانا وكام واحد قاعدين انهم رفعوا عليا سلاح نارى علشان يبقى محضر قصاد محضر 

أمين الشرطة بص لى بيقول لى متحبكهاش كدة ..قلت له لو فى مسمى للإرهاب هو دة الإرهاب بعينه المشاجرة بتكون موجهة من واحد إلى واحد زى ما احنا اتربينا كدة انا مستنيك برة ودة معناة ان اللى جوة فى المكان مش طرف وملهمش دخل

قالى انت بتدينى محاضرة ... قلت لا مش بديك محاضرة قالى شوف المحاضر اللى بعملها هنا يا اما محضر مشاجرة يا اما محضر تصالح علشان تبقى فاهم قلت له وحضرتك ليك تعمل محضر تصالح فى واقعة زى دى واقعة فى مكان عام حصل ترويع لآمنين وناس بتجرى وسلاح ابيض وسلاح نارى طب على الأقل حرز السلاح الأبيض والسلاح النارى قبل ما تقول هعمل محضر تصالح قبل دة كله فدخل امين شرطة كمان وكان معايا صحفى فى الأهرام قريب زوجتى وخدونى برة وقالو لى انت شايف منظر البلطجية تعالى وخلاص وسيبك من الموضوع دة لقيت امين الشرطة جالى برة وجايب البطاقة والكارنيهات بتاعتى وبيقولى ها هتعمل ايه لسة عايز تعمل محضر ... قلت آه يلا علشان نعمل المحضر فقال هتتهمهم بايه قلت قبل الإتهام والموضوع دة انا عايز الشرطة العسكرية اطلب لى الشرطة العسكرية أولا فلقيت اتاخد كدة علشان 

كدة الأطراف هتوسع والعملية هتكبر فقام واخد التليفون بتاعه وخرج برة المكتب وسابنى انا مع البلطجى عاشور دة وخد بقى كلام تهديد وتخويف من البلطجة موجه ليا من البلطجى واخوه بدأت بأنه مكنش قصدك يا بيه ومش عايز منك حاجة قلت له وانت لما توجه سلاحك توجه على الناس كلها ليه وتفزعنى انا واسرتى ليه قال لى طيب افضلوا بقى عايشين فى الفزع دة على 

طول فى الآخر بعد الحوارات البايخة دى انا خرجت واخدت بطاقتى وكرنيهاتى ومرديتش اعمل محضر بس علشان ظروف شغلى لا تسمح انى انا اكون موجود فى بيتى لمدة شهرين متواصلين تمام انا بسافر على المركب افضل عليها لمدة شهرين متواصلين فهل تعتقد انى هكون فى امن وامان وسايب بيتى لوحده اللى ممكن يتعرض لأى تهديد وانت تستشعر ان الجهاز المنوط بحمايتك شوية معرصين قاعدين بياولسوا مع البلطجية اذا كانت الشرطة نفسها متقدرش تحمى نفسها من هذا البنى أدم أكسجين : حضرتك معاك كارنيه قوات مسلحة وممكن الشرطة العسكرية تجيب لك حقك أومال الناس الغلابة يتعمل فيهم ايه ؟؟ هيتعمل فيهم اكتر من كدة مائة مرة ولا حد هيعمل لهم حاجة انا بقلك التعامل معايا كان تعامل سئ لحد ما ذكرت كلمة الشرطة العسكرية هاتولى الشرطة العسكرية وهو كان معاه الكارنيه من الأول ولا فارق معاه أى حاجة بس انا حبيت اعرف أمين ان حقى هو مش هيجيبه وقلت للبلطجى وانا عارف ان الكلام اللى بقوله ميفرقش معاك فى حاجة 

ولكن حقى عند ربنا هاخده وانا خصيمك ليوم الدين ويوم القيامة بإذن الله هقتص منك بأمر الله لأنك سبب اللى حصل فى وش الولد دة ويمكن تحسب الكلام دة ضعف ممكن تحسبه خوف وايا كان انا مقتنع ان الناس دى مش هاخد منها حق ولا باطل لأن فى الآخر اطراف أصيلة بتتصالح مع بعض تلاقى اطراف بعينها ملطوطة ولقيت المواضيع كلها محاضر قصاد محاضر وانت بتتمرمط وهو مش فارق معاه المرمطة وانا مش اخد حق ولا باطل امين الشرطة بيخلصها لصالح البلطجى علشان مصلحته معاه لأن الصعيدى دة جاى سياحة يومين وبالتالى مش عايز مشاكل وامين الشرطة مصلحته مع البلطجى فبيخدمه أكسجين : وعملت ايه فى حالة ابنك ؟؟

اخدت الولد بعد كدة وديته مستشفى طيبة فقالى الولد محتاج يتعمل له آشعة مقطعية على المخ لإحتمال يكون فى ارتجاج ولا نزيف لا قدر الله بس انا معنديش جهاز الآشعة المقطعية فتعمله فى مستشفى تانى وترجع لى بيه فرحت بيه من المعمورة لراس التين فى مستشفى القوات المسلحة المستشفى البحرة ففوجئت بيقولى والله معندناش قسم اطفال قلت له اطفال ايه دى حادثة مش حالة اطفال وحتى لو معندكش اعمل اللازم وبعدين حوله باسعاف لمسشفى اطفال مبقتش عارف ايه النظام دة دى حالة طارئة وحادث المفروض تتعامل معاها اسعافات اولية واجراءات ملهاش دعوة بالأطفال ففى احنا بنتكلم عن منظومة كاملة مليئة بالقصور من الألف الى الياء المهم اخدت الولد لمستشفى القوات المسلحة فى مصطفى كامل وعملوا اللازم من اول الأشعة ودكتور مخ واعصاب ومفيش مشاكل وأعطونا العلاج وقال خلوه تحت الملاحظة لو حصلت اعراض كذا ارجعوا بيه للمستشفى وكدة ووتابعناه وعرضتوا على دكتور تانى وكان اخد غرز فى ايده وتابعنا العلاج لكن المفزع ان طفل يحكى المشاهد المفزعة اللى شافها وتأثيرها على نفسيته ان واحد متعور وواحد بيخنقه وعايز يقطع رقبته ومش عارف ايه دى مشاهد يشوفها طفل عنده 3 سنين وتأثير دة عليه وهو نايم والكوابيس اللى بتحصل له بيتفزع كل شوية فدة اتعرض لصدمة عصبية بتخليه يتنفض والدكتور نصحنا انه لازم تبعدوه وتحاولوا تنسوه منظر الدم والفزع والجرى اللى شافه أكسجين : شايف الأمور هتمشى ازاى وهل هيكون فى حلول لأوضاع الأمنية دى فى البلد ولا الأمور هتمشى ازاى ؟؟ والله المسألة بتيجى حسب توجهات الشخص هيكون التعامل معاه يعنى انت لو معارض لأوضاع معينة فى البلد هيتقال عليك اخوان .. انا مثلا ظابط قوات مسلحة يعنى المفروض سيسى صرف لكن حسب الظروف الحالية للبلد واعتراضى على ما يحدث فيها هبقى اخوان تصنيفا فالمنظومة الأمنية دى حلها حاجة واحدة انها تتنسف من اولها 

خالص فاكر الكلام فى أول ثورة 25 يناير لما قدموا مقترحات على اننا لابد من تطهير جهاز الشرطة واعادة هيكلتها وهنجيب محاميين وخريجى حقوق يتدربوا على ايد القوات المسلحة وشوية تدريبات بس اللى محتاجينهم والشرطة المكسحة دى تقعد فى البيت ونمسك الظباط الصغيرين غسيل مخ من الأول خالص وتدريب جديد لمدة 6 شهور وتعالى مع بعض القيادات السياسية مش قيادات شرطية ونبدأ من جديد نتفاهم فى الموضوع دة انما لو عايز تتطهر فكر او تمشى واحدة واحدة مش هينفع الكبير بيوسخ الصغير أكسجين : على كدة وزير الداخلية يبقى مدنى ولا عسكرى من رجال الشرطة ؟؟ هى الشرطة اصلا هيئة مدنية أكسجين : اقصد ان يتولى الوزارة حد من خارج الشرطة شخصية سياسية يكون حصل على تديب معين يعرف 

المنظومة وكدة فقط والله دة حل لحد ما المنظومة تتصلح لأن الإصلاح لازم يجى من فوق لتحت مش العكس لأن المنظومة بتفسد من فوق اللى فوق بيفسد اللى تحته فلازم الإصلاح يكون من القيادات ودة حالنا من زمان احنا فى عذبة ومش هتتغير أكسجين : ليه بتشعر بيأس من اماكنية التغيير ؟؟ لأنى يوم 25 يناير انا نزلت وفى 28 يناير نزلت فى اسكندرية وهم دول اليومين اللى نزلتهم ومنزلتش بعدها غير فى 25 يناير ضد الإخوان وهم نازلين يحتفلوا وانا نازل اقولهم انتوا نازلين تحتفلوا بايه على الدم بتاع الناس فى احداث مجلس الوزراء ومحمد محمود جايين تحتفلوا بايه واتفاجئ بعد كدة انهم بيتهمونى انى ضد 30/6 رغم اننا نزلت معاكم ضد الإخوان والاقى ان 25 و28 يناير اللى نزلت فيهم كانت اول مرة فى حياتى احس انى بنى آدم لأول مرة فى حياتى احس انى بنى آدم ليا صوت ممكن اطلعه ينضم لصوت واحد جنبى نقول نفس الكلمة وتتسمع وتهز شخص ويترعب علشان وقفنا وصوتنا واحد وللأسف الروح دى بعدت دلوقتى وانا بغرس فى ولادى احنا بلاد الله لخلق الله احنا بلدنا اللى فيها اكل عيشنا وبس