بالصور : لأول مرة اعتصام واضراب تعجز الداخلية عن التعامل معه (معتصمين المجلس القومى)

 الخميس 11 سبتمبر 2014 

د/ يحيى عبد الشافى

تصوير : محمد اكسجين
كتب : شهر زاد الثورة

حوار أكسجين مصر مع المعتصيمن والمضربين من معتقلى الشورى داخل المجلس القومى لحقوق الإنسان أكسجين : ايه سبب اعتصامك النهاردة ؟؟ د يحيى عبد الشافى : انا معتصم ومضرب عن الطعام اضراب كلى للوصول لهدفين رئيسيين الأول اسقاط قانون التظاهر الجارى وكافة ما ترتب عليه من احكام قضائية ..والهدف الثانى الإفراج عن كافة معتقلى الرأى دون تصنيف سياسى فورا نتعرف عليك ونعرف انت ليه هنا النهاردة ؟؟ انا عبدالله نبيل ذكى احد المضربين المعتصمين داخل المجلس القومى لحقوق الإنسان واحد معتقلين مجلس الشورى اللى محكوم عليهم ب15 سنة سجن لمجرد انه بيمارس حقه الطبيعى فى التظاهر بشكل سلمى بدون اى عنف فى وقفة امام مجلس الشورى وانا هنا داخل المجلس القومى لحقوق الإنسان لأن هو حائط الصد الوحيد اللى المفروض بيحمى حقوق الإنسان فى التظاهر السلمى والإعتصام السلمى والإضراب عن الطعام وانا هنا بطالب المجلس القومى انه يتخذ الموقف بتاعى من قانون التظاهر 

وتضامن محمد الباز احد معتقلى مجلس الشورى المحكوم عليهم بالسجن 15 عام ومائة ألف جنيه غرامة وخمس سنوات مراقبة لخرق قانون التظاهر فى حين اننا وقفنا امام مجلس الشورة لمدة ربع ساعة فقط فى وقفة سلمية وأنا أعلن تضامنى واعتصامى واضرابى عن الطعام لحين اسقاط قانون التظاهر وما ترتب عليه من احكام مطالبا بالإفراج عن كل معتقلى الرأى دون تصنيف سياسى 

وقال يسرى مصطفى احد معتقلى مجلس الشورى احنا هنا علشان المجلس القومى لحقوق الإنسان هو اخر مكان نلجأ ليه لأن المفروض انه بيدافع عن حقوق الإنسان ومفيش اعتصام بيتم فى أى مكان غير لما الداخلية بتضربه مفيش اضراب بيتم غير لما الداخلية ممكن تدخل تاخدنا منه فاحنا هنا المفروض المجلس بيحافظ على حقوق الإنسان المفروض انه يدعم مطالبنا ويحمى حقنا فى الإضراب والإعتصام حتى تنفيذ مطالبنا بالإفراج عن اى معتقل رأى واسقاط قانون التظاهر وما ترتب عليه 

وفى تساؤل آخر من أكسجين مصر للدكتور يحيى عبد الشافى عن مدة الإعتصام وما يتبعه من اجراءات أو تصعيد ؟ أجاب : احنا دخلنا المكان بطريقة لائقة ونطالب بحقنا الشرعى والقانونى ودة آخر مكان ممكن نلجأ له علشان نعبر عن رأينا ونوصل للحرية لجميع المساجين احنا هنا دخلنا ووفروا لنا هذه الحجرة فى الإستقبال وهنقعد هنا كدة زى ما انت شايف احنا فضلنا يومين قبل اعلان الإضراب معتصمين هنا وبعدين اعلنا اضرابنا يوم الأحد الساعة 12 ظهرا بعد جلسة مع احد اعضاء المجلس التنفيذى لحقوق الإنسان والحمد لله قابلنا بعض المضايقات لأن دى أول مرة حدث يحصل زى كدة داخل المجلس 

القومى ولكن فى جزء كبير منهم متفهم للقضية وبيحاول يتعاون معانا والمجلس نفسه ضد قانون التظاهر فاحنا من هذا المنطلق اتينا إلى هذا المكان واحنا مصريين نكمل اعتصامنا لحد سقوط قانون التظاهر ولحد ما اخوانا المعتقلين يخرجوا من السجون وكافة معتقلى الرأى ..احنا هنا بناخد المية بس ومحلول الملح ومحلول الجفاف ينسون وحاجات بدون سكر وبعد خروج الموظفين بيتم اغلاق المكان ومسموح لنا بالتحرك لحد الحمام فقط فى آخر الطرقة ووعدونا انهم يفتحوا الباب ويسمحوا لنا بالخروج فى الحديقة 

أكسجين : ازاى جت فكرة الإعتصام داخل مجلس حقوق الإنسان ؟؟ 
والله دة كان توفيق من الله سبحانه وتعالى ودة دليل ان الثورة لن تموت طالما مازال الشباب يفكر ويأتى بالجديد وعندهم الجرأة انهم ينفذوا بسلمية فالمفروض الناس الكبيرة تحترمهم وتفهمهم وتشجعهم ويرفعوا لهم القبعة ويعلموا ان دة دليل على ان الظلم منتهى وان الثورة قادمة فعليهم ان يلحقوا نفسهم فاحنا هنا بنوصل رسالة اننا لن نيأس ولن نتراجع ولن نستسلم فى آلاف من الدماء سقطت على الأرض ازاى نفرط فيها لو فرطنا فيها يبقى بنفرط فى نفسنا وفى مستقبل اولادناو أحفادنا انا عن نفسى سايب شغلى وفى ناس هنا سايبة شغلها وموظفين وسايبين شغلهم وسايبين اهلهم وكل دة رموه من ورا ظهرهم علشان بندافع عن مصر ومكملين ان شاء الله ارواحنا فداءا لمصر وللحرية ولا يمكن ان نتراجع لا يعقل ابدا ان ناس مخلصة تموت فى احداث مجلس الوزراء ومحمد محمود ودماء طاهرة ورجال اكابر وغيرهم واحنا نفضل نتفرج ويرجع نظام مبارك بصورة اشد واعنف مرة اخرى واكثر شراسة حتى القتل اصبح فى الشوارع مباح بدم بارد شباب زى سيد وزة وكريستى وجيكا والجندى وغيره وغيره متعدش 

أكسجين : طب هل بتقابلوا مشاكل هنا فى انقطاع الكهربا او غيره ؟ الحمد لله النور هنا مبيقطعش وهم شغلوا لنا التكييف امبارح بعد ما نزلنا على الفيس بوك واشتكينا وبرضوا البطاطين قعدت يومين برة ومدخلتش غير يوم الحد يعنى فى مضايقات نتيجة الضغوط عليهم من الداخلية وهم مش عايزينا نقعد 

أكسجين : هل حد حاول يتدخل لفض الإعتصام من الداخلية أو من اعضاء المجلس نفسهم ؟؟ 

هو فى محاولات وضغوط من الداخلية يعنى وزير الداخلية نفسه اتصل بيهم وحاول يطالبهم بفض الإعتصام او التدخل فرفض رئيس المجلس القومى لحقوق الإنسان رفض تدخلهم وقالوا لهم الشباب دول هنتناقش معاهم وفعلا عملوا لنا جلسة استماع مشكورا فالحمد لله ظننا بالمكان دة طلع بمحله وهم فعلا مظلة تحمى حقوق الإنسان وننتظر منهم التضامن معنا 

أكسجين : فى سؤال لعبد الله احد المعتصمين والمضربين عن المدة التى ينوى فيها الإضراب والإعتصام لحد امتى ناوى تكمل ؟؟ 

احنا مضربين ومعتصمين لحد ما تتحقق مطالبنا واسقاط كل التهم والأحكام الصادرة على قانون التظاهر والغاؤه والإفراج عن المعتقلين واحنا هنحضر جلسة مع المجلس التنفيذى وهنرجع نكمل اعتصامنا والحمد لله تمام مفيش مضايقات المضايقات كانت من جانب اجهزة الدولة لأعضاء المجلس القومى لحقوق الإنسانبسبب تواجدنا بداخله و للضغط علينا لفض الإعتصام ومن ابرزها المكالمة اللى تمت من وزير الداخلية للضغط على احد اعضاء المجلس وقاله احنا ممكن نيجى نفض الإعتصام بنفسنا وباستخدام القوة طبعا قاله للأسف انا مش هقدر ادخلكم عندى ودة كان رد صريح ودة كان ظنى بالمجلس اللى هو المفروض انه الدفاع الأول عن حقوق الإنسان فى التظاهر السلمى فى الإعتصام السلمى حقه فى التعبير عن رأيه وفى الإضراب عن الطعام فدة كان ظنى فى اعضاء مجلس حقوق الإنسان وانا متصور ان ممكن يحصل تصعيد آه فى تصعيد لو متحققتش مطالبنا سواء فى الجلسة اللى جاية يوم 10 /9 القاضى قرر يتحفظ علينا هيحصل تصعيد لو احنا خرجنا وزمايلنا مخرجوش هيحصل تصعيد حتى لو خرجنا كلنا هيحصل تصعيد اللى انا عايز اقوله ان اعتصامنا واضرابنا عن الطعام مش علشان قضية مجلس الشورى بس احنا هدفنا اسقاط قانون التظاهر نفسه قضية مجلس الشورى ما هى إلا وسيلة احنا 

اخدنها لإجراء وتحقيق غاية والغاية دى هى اسقاط قانون التظاهر وهى دى وسيلتنا الوحديدة وبناءا عليه احنا بنتصرف 
أكسجين : طب ايه وجه اعتراضك على قانون التظاهر نفسه ؟؟ 

انا معترض على قانون التظاهر علشان بيتم من خلاله اعتداء صارخ على حق مكفول فى الدستور وفى كل دساتير العالم وهو الحق فى التظاهر السلمى وفيه اعتداء واضح ومباشر على كل ثوار 25 يناير المجيدة واساسا هو قانون غير دستورى ومخالف للمادة 73 من الدستور المصرى 2014 اللى بينص على حق التظاهر والتجمعات السلمية بمجرد الإخطار غير طبعا وسائل التعذيب الممنهجة داخل السجون اللى بيستخدمها النظام الحالى محاولا استرداد دولة مبارك فى التعذيب ودة طبعا منقدرش نخفيه آخر تقرير كنا سمعناه عن التعذيب فى السجون كان فيه 91 حالة وفاة داخل السجون من التعذيب وسواء الرقم اكتر أو اقل احنا بنرفض دة واحنا بجد بتعذب بطريقة ممنهجة ومش شرط تعذيب بدنى ممكن نتعذب عذاب نفسى كمان أكسجين مصر تضيف إليكم انه حال كتابة واعداد هذا الحوار حكمت المحكمة بتأجيل قضية معتقلى مجلس الشورى 15 يوم فى الجلسة المنعقدة 10 /9 وقد غادر المعتصمون المجلس لحضور الجلسة ولم نعرف ان كانوا سيعاودون الإعتصام ويكملون اضرابهم ام لا