بسبب السيسي إتخانقت مع السواق

بسبب السيسي إتخانقت مع السواق فنزلني علي الطريق ورغم ظلم هذا التصرف وقسوته لكنه لاقي قبول وارتياح من كل الركاب ، ولان الطريق مش طريق مواصلات و في منطقة غير مأهولة بالسكان اضطريت أمشي لأقرب قرية ، وفي أول القرية فوجئت بغرفة مفتوحه علي الشارع بطول الجدار ، ولما وقفت امامها وجدتها عبارة عن مرسم وفيه بنت قاعدة امام لوحة بترسمها ، كانت لابسه ملابس عصرية انيقة عبارة عن جيبة وبلوزة نصف كم ( نصف كام خالص ) كان شعرها قصير جدا قريب من قصة شعر الولاد، وكانت ملامحها الرقيقة تتماشي مع النوع دا من قصات الشعر ( كما يقول الخبراء )
ـ لو سمحتي عايز اقرب مكان اركب منه للمنصورة
ـ ياااااااه المنصورة دي بعيدة اوي وايه اللي جابك هنا
قلت في سري وواحدة زيك ايه اللي جابها هنا وبتعمل ايه هنا اساسا
البنت كان بها جاذبيه غريبة من النوع الذي لا نعرف سببه ، فقط تنظر وتعيد النظر مرات ومرات و لا تفهم السبب فقط الجاذبية سيدة الموقف بلا منطق او سبب واضح تنظر اليها حتي قد تصل بك الحال الي ان تكون مجذوباً ( بالمعني الصوفي ) .
وانا بتكلم معها سألت نفسي هل هي ودوده مبتسمة كده مع كل الناس حتي مع عابري السبيل اللي زيي ولا فيه انجذاب من ناحيتها هي كمان ؟ و فجأة دخل احد الأشخاص كان يرتدي جلباب نظيفا وانيقا ويبدو من طريقة كلامه انه غير متعلم ، واتضح انه اخوها ، شعرت بالغضب من ظهوره ، كان يبدو لي شخص اصفر مثل لون الرمال التي يقف عليها ، وبعد أن عرف الموضوع كرر كلمة "اتفضل " عدة مرات بشكل آلي ، وبعدين أشار الي الطريق الأسفلت وقال "بعد ان تصل الي هذا الطريق تاخد شمال ، وبعد كيلو و نص هتلاقي قرية فيها موقف تركب منه للمنصورة " شكرته وتوجهت الي الطريق ، ولم اتجرأ ان انظر الي الفتاة ولو مرة أخيرة لأشكرها علي اهتمامها ، وفجأة سمعت صوتها يقول " استني انا جايه معاك " وفجأة وبدون سبب واضح صحيت من النوم ، لا كان فيه منبه رن ولا حد صحاني ... حسيت بالحسرة وغمضت عنيا عشان انام تاني بسرعة عشان اقابلها مرة تانية ، وفعلا نمت وصحيت ونمت وصحيت اكتر مرة ، لكن ما شفتهاش تاني للأسف

حلم قديم

----------------------------------------------------------------------------------------------------------