الفضفضة تحولت لسبّوبة كبيرة

د/ هانى مصطفى

 أول ما هتكلم عن الفضفضة هتلاقي البنات متنّحة والولاد منفّضة وبتقول ده كلام سهوكة وشوية نحنحة وبتاع 
بس الحقيقة اللي حضرتك مش عارفها إن الفضفضة من كتر ماهية بقت نادرة وصعبة اتحولت لسبّوبة كبيرة 
أيوة سبّوبة 
فيه ناس اسمهم أطباء نفسيين وأخصائيين نفسيين شغلتهم سماع الفضفضة, 
والأجمل بقى إنها بقت علم وبيدرس وبيتاخد فيه دكتوراه وأبحاث دولية وقطرية ولولبية 
آه والله كل ده عن الفضفضة
طب سؤال
تعرف ( إله الفضفضة المستكنيص عن الرومان) ؟
متعرفوش ؟؟
طبعا متعرفوش .لأن محدش مهتم بالفضفضة, حتى الرومان ذات نفسياتهم ( نسيوا يعملوا للفضفضة إله أساسا )
السؤال بقى
.. ليه احنا بقينا نخاف نفضفض
رغم ان سيادتك بتبقى هتموت وتحكي وتشكي وتبعبع ,
.. لإنك خايف من صاحبك إنه يسخر من مشاعرك أو يتعامل معاها بسطحية أو يرزعك نصيحتين يأكدوا إنك معفن وتافه
أو تخافي صاحبتك تتسلى بأسرارك وتشردلك في الشلّة
ساعتها شكلك هيبقى ...... خالص
السؤال الأرخم بقي
هوة ليه احنا بقينا رخمين لدرجة اننا بنسخر من مشاعر بعض أو بنتفّهها أو بنشرّد لبعضينا لييييه !!
طب ما الأسهل نبقى لطاف والله
اسمعي من صاحبتك قدّري مشاعرها .. سانديها ..بس كدة , بدون استفسارات بدون نصايح ( ودي علميا اسمها Ventilation يعني تنفيس عن المشاعر بدون أسئلة ولا تمحيص ولا نصايح
خليكي قريبة بمشاعرك ببساطة لإنك بكرة هتحتاجي لحد يساندك ويسمعك ويتفهّم ضعفك .. قدّم السبت تلاقي الحد .. بسيطة .. وتوفّروا فلوس الدكاترة على الأقل
ساعات بنكون حابين نقرب قوي ونعمل فيها فلاحيص فنسأل عن ظروف وملابسات الأزمة اللي بتتحكي فين وإزاى وليه ومش بنركز في المشاعر خالص دي بقى اسمها Debriefing ودي منصحكش بيها لأن أبحاث كتيرة بتقول انها رخمة ومش جايبة همها أو على الأقل سيبها للمتخصصين إحنا بنعرف نختار الوقت المناسب لاستخدامها
لكن لو سبتي صديقتك تحكي بتفاصيل المشاعر والشجون اللي مرت بيها ووصفت اللي حصلها كأنها بتحكي فيلم فيدو صوت وصورة ومشاعر ودموع وألم
ده بيكون أفضل طريقة تسمع بيها قصة من حد انت بتحبه
دي آخر حاجة اكتشوفوها وبيسموها Narration يعني الحكي أو السرد
انا شخصيا بحبه وبحب أعيط ونعيط ونقلب الجلسة شحتفة ومناديل 
المهم اسمع قرب تعاطف حسس صديقك بالأمان
بكرة هييجي يوم هتحتاج صديق قريب
اتقابلوا واحكوا وفضفضوا وبطلوا شات شوية 
---------------------------------------------------------------------------------------------------------- اكسجين مصر