فوزى الرشيدى يكتب : الشعب يريد أى حاجه والنبى
شعب طيب أوى يا خال ، قاعد قدام وطن يقول وطن لله ، آمان وكرامه لله ، شعب كان بيهز الأرض بصوت مسموع ، الشعب يريد تغيير النظام ، أصبح خلاص صوته موجوع لـ الخلف دُر الكل رجوع ، ولما قالها ليهم مبارك المخلوع أنا أو الفوضى فكان هو والفوضى موجود و الشباب اللى نزل وثار عليه فى لحظة خلاص بئى هو المخلوع .
قالك خلاص مشى مبارك وجات انتخابات ، لبس النظام دقن و ذبيبه والشعب قال خلاص جالنا الشيخ الرئيس المؤمن بتاع الدين ، طلعت الدقن محموله تتركب وتتشال حسب الطلب والذبيبه طلعت معموله تتحط وتتشال حسب الصفقة ، ممكن تكون تاتو لو قاعد مع ليبرالى أو علمانى ، وممكن تكون نسر أو دبوره لو الصفقة عسكرية إسلامية ويامشير إنت الأمير ، وبعد ماكان إخترناه إخترناه أصبحت بايعناه يايعناه ، والدين بئى بالكيلو وعبيلو وأديلو ، والأراضى وزوعوها سينا لحماس ، وحلايب وشلاتين للزوول السودانى ، والتفريعه والأهرامات وماتبقى من أراضى مصرية بيعرضوها على الدويلة القطريه ، وبعد ماكان برلمان عز وموافقة ، جالنا برلمان هوهولز وترمادول تحت القبة شيخ وبعد ماكان إعلام تكفيرى ياواد يامؤمن وناس غريبه ماليه الشاشات والإعلام ، وناس تدعى ع الشعب وناس تقول آمين ، وذكرى أكتوبر المجيده تلاقى القاتل فى المنصة بيحتفل بجريمته ، والاعلان الدستورى والاتحاديه والجبنه النيستو يامعفنييين ، اتخنق الشعب لأنه بيحب الجبنه وقررينزل شهر يونيو يوم 30.
و نزل الشعب الثوار والفلول وقالوا للخاين إمشى غور ، وبرغم نزول كل الفلول لكن مش كل اللى نزل فيها فلول مثلما كانت ثورة يناير كل الشاب الطاهر النقى نزل فيها لكن مش كل اللى نزلها طاهر نقى.
قال الشعب خلاص خلعنا تجار الدبن ولبس النظام البدلة العسكرية من جديد ورجع على فرس أبيض لأنه عرف يلعبها صح سلم تجار الدين للشعب ، خلع عنهم قناع الدين وظهر وجههم الحقيقى ، الإسلام هو الحل للوصول إلى الكرسى ، ورجعت البدلة العسكريه لكن عليها بدلة مدنية ومش مهم ماهو الشعب بيحب أى حاجه آخرها إيا ، عسكريه ، دينية ، مدنية ، مهلبية ، أى حاجه آخرها أيا.
وطلعنا من تجار الدين وقعنا فى تجار الوطنية ، وأى حد يعارض بعد ماكان كافر أصبح خاين وعميل وطابور ، وبعد إختارناه إختارناه وبايعناه بايعناه ، حاليا فوضناه فوضاه.
وبعد ماكان إعلام الواد المؤمن وخميس، وقعنا فى إعلام البط وهاااححححح ولميس.
ويعد ماكان بيهددونا نحكمكم أو نفجركم ، أصبحنا نحكمكم ونحبسكم ونقتلكم وأنتم شايلين الورد أو وأنتم بتتفرجوا على ماتش كوره ، أو انتم بتتفرجوا على أحمد موسى هتموتوا بالتشويه أو الغيظ من الصوت الفز المملوء كذب وتضليل ، أو تموتوا فى ليبيا علشان مصريين محدش هيسأل عنكم وهنلاقى كتير يردد أيه وداهم هناك ، ماهى جمله معهوده فى كل العصور، وبعد برلمان عز وموافقة وبرلمان تحت القبة شيخ راجع من تانى برلمان الراقصة والطبال وكل فلول كان مكروه وراجع يقول سيبوا الشعب الفقير الجاهل يختار ، يختار إزاى والفقر موجود ، والجهل موجود، صوت واحد جاهل كفيل بضياع أمه كاملة.
ويوم مانطلب شباب ياخد مناصب يجى شباب يكرهك فى المناصب والمنصوب عليه من أجل عودة الحاج لأن الشاب المحطوط غير مؤهل وبيرفد سيدات علشان جمالو وكأنهم ملكة يمينه.
نفس أسلوب شوف الشعب عاوز أيه أعطهولوا لكن اعطيه اللى عاوزه وخليه يكرهو علشان ندخل ننقذه بخبراتنا ويسقفولنا وإحنا داخلين .
فى النهايه الشعب يريد أى حاجه من أى حد آخره أيا ، خدوا المناصب والكراسى لكن سبوله الوطن.
فوزى الرشيدى
--------------------------------------------------------------------------------------------- اكسجين مصر
0 تعليقات
أكتب تعليق على الموضوع