بالصور غرق ناقلة الفوسفات بقنا والنيل لم يتأثر بغرق ناقلة الفوسفات

تصوير: احمد يوسف

انا لسه جاى من كورنيش قنا دلوقتى (موقع ناقلة الفوسفات) .
يقول احمد يوسف مراسل اكسجين من قنا الوضع سيئ للغاية
الساعة دلوقتى تقريبا 11 الصبح ومفيش غير واحد بس من الشرطة جه ومعاه بوكس وجايب بنته معاه بيفسحها تقريبا !!!!
المهم ده مشى , وبعدها جه لانش صغير عليه كام عسكرى ودخلوا المركب الغرقانة ولقيت 4 رتب من الشرطة تقريبا (كانوا لابسين مدنى) وقاعدين على الترابيزة اللى جنبى وجايبين كانز لبعض وبيحكوا بس مسمعتش بالظبط الكلام .
الخطير بقى ان ريحة الفوسفات مغطية الكورنيش حاليا !!!
وسمعت معلومة من مصدر هناك ان سواق المركب كان غلطان وكان نايم او بيتعاطى حاجة حسب تعبير المصدر لانهم مرة واحدة فوجئوا بالمركب رشق فى كوبرى دندرة , وانا المركب تم نقله على المرسى بمساعدة العمال والاهالى فقط ومحدش ظهر خالص من "الدولة" !!
المعلومة الاخطر بقى ان المصدر ده قالى بما ان السواق تبع الجيش فسمعوا كلام اثناء نقلهم للمركب انهم " هيعتبروا " ان السواق مش غلطان وان الخطأ كان سببه انقطاع فى الواير (السلك) الموجود على المركب !!!!!
والله على ما اقول شهيد
ويقول م/ احمد شريف مهندس كيميائي:
...نتكلم بطريقة علمية شوية فى موضوع الفوسفات الحجرى اللى غرق من على صندل فى قنا.
أنا مهندس كيميائى شغال فى معالجة المياه، يعنى الكيماويات و قدرتها على الذوبان و التركيزات بتاعتها دى لعبتى. فاسمعوا الكلمتين دول.
أولا. الفوسفات الموجود فى الحجر غير قابل للذوبان فى الماء. لأن الحجر ده بيتم إستخلاص الفوسفات منه فى مصانع بطرق صناعية و كيميائية معقدة وتتصنع منه أسمدة بعد كده.
ثانيا. نسبة الفوسفات فى الحجر حوالى 20% والباقى صخور كلسية مفيش منها أى خطر. يعنى ال 500 طن دول فيهم 100 طن فوسفات غير قابل أصلا للذوبان. طب لو فرضنا جدلا أنهم قابلين للذوبان؟ يبقى الفوسفات الموجود على سطح الحجر بس هو اللى هيدوب، وده نسبته أقل كمان.
ثالثا. النيل بيعدى فيه 200 مليون متر مكعب مياه فى اليوم. لو فرضنا ذوبان الطن فوسفات بالكامل فى يوم واحد وهو شيء مستحيل عمليا، يبقى تركيز الفوسفات فى المياه سيصل لمعدل قليل جدا جدا لا يسبب أى ضرر فعلى، حيث سيحتوى كل متر مكعب من الماء على نصف جزء من مليار.
كده نقدر نقول إن الفوسفات اللى فى الحجر ده مفيش منه خطر فعلى. طب اليورانيوم؟ أيوه الحجر ده فيه نسبه يورانيوم حوالى 0.4% يعنى حوالى 2 طن. برضو غير قابل للذوبان. و المروقات فى أى محطة مياة قادرة تماما على التخلص من المعادن الثقيلة بمنتهى البساطة.
الأكيد إن كمية الحجر دى مش هتفضل غرقانه كتير لأنها غالية. مصر حاليا بتعتمد على الحجر لإنتاج السماد و اليورانيوم كمنتج ثانوى.
عملية الانتشال ممكن تاخد وقت حسب صعوبة الوضع طبعا انا مش هناك ف معرفش، بس الأكيد إن الموضوع فعلا مش كارثة و مش محتاج هياج ولا تخويف للناس.
---------------------------------------------------------------------------------------------
اكسجين مصر