 |
| اصابة سكان ابنى بيتك وتحطيم سيارتهم وسرقة اموالهم |
 |
| البلطجيه هما وبيعتدو على احد العمال |
استغاثة من سكان مدينة 6 اكتوبر قسم ثانى بمشروع ابنى بيتك من بلطجة وسطو مسلح وفرض اتاوات وضرب وتكسير سيارات ولا وجود لسيارة امن ولا عسكرى شرطة واحد .. هى شكوى تكررت لشهور وحياة من الجحيم تحت سيطرة عشرة من البلطجية مسلحين ايه شكل الإتاوات اللى بيفرضها البلطجية على الناس وليه الناس تدفع ؟؟ بيفرضون الإتاوات على سيارات الأجرة خمسة جنيه فى الموقف و2 جنيه عن كل دور يعنى حوالى 40 سيارة اجرة تدفع 200 جنيه على الصبح وكل سيارة بتدفع من 50 ل 60 جنيه اتاوة فى اليوم ......وبالتالى سواق الأجرة بيجمع
الإتاوة زيادة من الأجرة على المواطن ... لو جت عربية رمل او زلط بياخد منها اتاوة علشان يسمح لها بالدخول ... المقاول اللى بيبنى لى بيتى بيدفع عن الأعمدة 500 جنيه وعن السقف 500 جنيه وطبعا باضطر ادفعها انا ... الناس بتضطر تدفع علشان اللى بيمتنع بيحرقوا عربيته وبيكسروها بيعطلوا شغله ..بيقطعوا عليه الطريق . دة غير السرقة بالإكراه والسطو المسلح على الشقق ... غير ترويع ولادنا فى الصبح والمسا وبناتنا ونساءنا ... غلبنا نشتكى ونعمل
محاضر والمحضر يتم حفظه او يجبر المواطن على التنازل تحت تهديد حياة ابناؤه او اشعال النار فى بيته يقول محمود جاد : انا مواطن تم الإعتداء عليا من البلطجية وضرب اخويا وتكسير سيارتى كل دة بسبب رفض دفع الإتاوة عملنا محضر فى القسم واثبتنا حالة السيارة وتمت المعاينة وتم اثبات وجودج سلاح آلى واتحول المحضر للنيابة ولما رحنا النيابة وجدنا الكلام المثبت فى المحضر تم تزويره فقد تم تعيين سيارتى وهى من نوع سبرانزاتيجو ووجدت فى النيابة ان امين الشرطة كاتب ان العربية نيسان رغم انى اكدت على نوع العربية فى المحضر وهو غيره علشان يفتح
ثغرة للبلطجية يخرجوا منها كمان مفيش سيرة فى المحضر لوجود اسلحة ولا بندقية آلى زى ما قلنا فى اقوالنا ولما قلت لوكيل النيابة على التغيير اللى تم فى المحضر وعرضت عليه صور العربية اتعاطف معانا وعمل ضبط وزاحضار للمتهمين بس فين لما تبقى الشرطة تمسكهم ... المشكلة هنا اننا بنعانى من قلة المواصلات وعدم وجود وحدة صحية يعنى علشان نروح لدكتور اقرب مستشفى على بعد 15 كيلوا وارقب صيدلية على بعد 15 كيلوا العيش والصحة والمواصلات كل دة نتحمله ويهون لكن الأمن مفيش عربية شرطة ولا دورية ولا عسكرى جيش ولا كمين احنا ش عارفين ننام من السرقة والبلطجة والإتاوات وكل يوم اعتداء على المواطنين وعايشين فى رعب على ولادنا وبناتنا وغلبنا نعمل وقفات احتجاجية قدام مجلس الوزراء ورحنا من شهرين للواء طارق القصر واللواء محمد فاروق ومجدى بيه عبد العال مفتش مباحث 6 اكتوبر
يقول محمود لو الشرطة محتاجة ندفع لها اجرة سيارة بوكس والعساكر اللى بتقف ندفع لهم بدل ما ندفع اتاوة للبلطجية يعنى لو كانت الدولة مش بتدى لهم حقهم والبلد فيها ازمة احنا مستعديين ندفع للشرطة اجرة عربية البوكس وكمين او دورية متحركة بس يرحمونا ويرحموا عيالنا م الرعب اللى عايشين فيه الجدير بالذكر ان مشكلة اهالى ابنى بيتك تم طرحها اكثر من مرة فى الإعلام عن طريق برنامج مانشيت لجابر القرموطى وبرنامج البرلمان وتم الإستجابة المؤقتة بحل يشبه المسكن فى حملة امنية امام الكاميرات تم القبض على عدد من البلطجية ثم عاد الوضع على ما هو عليه . ويذكر محمود ان احد السكان المتضررين صمم على عدم تغيير اقواله فى محضر النيابة رغم تهديده وبالفعل تم الحكم على البلطجى بالسجن 6 اشهر وفى الإستئناف عادوا يهددون اسرته لتغيير اقواله فى جلسة الإستئناف المقررة 1/7 القادم ... وما زالت الدائرة مستمرة بين اقسام الشرطة والنيابة والتهديد واستمرار البلطجة دون رادع
----------------------- اكسجين مصر :اسعى لاثبات الحقائق المجردة فهذا ما تقضيه امانة الكلمه
0 تعليقات
أكتب تعليق على الموضوع