رشا عادل تكتب: حاجات تعمليهم قبل ال date

حاجات تعمليهم قبل ال date

١- اغسلي شعرك قبله بليلة و سشوريه لو بيحتاج سشوار، ماتسيبيش الشعر ليوم الديت نفسه الا لو انتي ستايلك ناتشيورال فمش هيفرق معاكي و ده عادي و جميل طالما لايق عليكي

٢- اعملي اي ريلاكسيشن روتين زي ساونا، چاكوزي، مساج، بابل باث، او سباحة ساعة قبلها بليلة او في نفس اليوم الصبح المهم تبقى في المود

٣- حطي مية ورد على جسمك و خدودك، كتير قوي بقا، عشان الدنيا بتبقى ربيع و كل الافكار الشريرة بتختفي مع مية الورد

٤- حضري اللبس اللي هتلبسيه قبلها بليلة و قسيه عشان ما تتفاجئيش انك تخنتي شوية او خسيتي كتير، اسوأ شئ هو اللبس اللي مش عالمقاس، حتى لو الطقم غالي اوعي تلبسي حاجة مش ظابته على مقاسك، ممكن تلبسي حاجة قديمة مناسبة و بردو تبقى شيك،

٥- البسي جزمة مريحة لانك ماتعرفيش هتمشي قد ايه و ممكن تروحوا فين بعد العشا، ممكن تروحوا قهوة عالبحر بيتنزل لها عشرميت سلم، الكعب كمان ما يتلبسش غير للحبيب اللي تقدري تتسندي عليه فماينفعش اول ديت

٦- الديت بتاعك راجل غريب حتى لو اتكلمتو كتير قبل كدة، ماهواش صديقك و ماهواش حبيبك تعاملي على هذا الاساس، انتي بتكتشفيه زي ماهو بيكتشفك،

٧- اللي بينجح في الديت هو الطرف اللي بيسمع اكتر، اما الطرف اللي بيتكلم اكتر بدون تفاعل في الحوار فهو الخسران تماما لانه هيقوم من عالكرسي عاشق الطرف الاخر لانه استمع له و بيكون مفترض انه طالما قعد يسمعه و ما علقش يبقى موافق على كلامه، بالتالي ده الطرف اللي هياخد على قفاه في الاخر او يتصدم لما يجيله الرفض

٨- كلي وجبة خفيفة قبل ما تنزلي من بيتك، حتى لو هو عازمك على الغداء، عشان ماتبقيش نازلة هفتانة و مايجلكيش صداع، لانك ماتعرفيش المطعم هيقدم الاكل بسرعة ولا هيتاخر ٤٥ دقيقة، ولا اكلهم هيطلع حلو ولا وحش، لانك رايحة تسمعي كلام الراجل و تقيمي طباعه مش رايحة تاكلي

٩- رطبي وشك بكريم ليلي بالليل و نهاري الصبح عشان ماتحتاجيش تهريه مكياچ، كفايا كريم اساس، بلاش بودرة الا على المناطق الدهنية فقط، زي الجبهة، بوز مناخيرك مش كلها، بوز الدقن، طبعا مش محتاجة اقولك ان البودرة تكون شفافة او لون بشرتك بالضبط، ممكن ماسكارا خفيفة، بلاش السموكي ايز، لانه لو شافك بعد كدة من غير سموكي هيفتكرك مريضة و بهتانة، خلي السموكي لخروجات مابعد الصحوبية و في المناسبات، ممكن ماسكارات خفيفة مش بتاعت حفلات، الروج يكون لون شفايفك بلاش احمر او فوشيا او دهبي، مافيش داعي للبلاشر لكن لو حطيتي يبقى لون ترابي خفيف، او لون مشمشي، مافيش داعي لمكياج تاني اكتر من كدة، مافيش داعي لالوان فوق العين نهائي، انتي رايحة تتعرفي على شخصية واحد و تعرفيه على شخصيتك مش على علبة الالوان بتاعتك

١٠- مش هوصيكي تستحمي قبل الديت (في نفس اليوم) استحمي بشاور جيل بلاش صابون، رشي مية ورد على جسمك بعدها، لو في الصيف ماتنسيش مزيل عرق خفيف، لو في الشتاء انتي حرة بقا حسب طبيعة جسمك، شخصيا بميل للطبيعي اكتر، في شابة مطحونة بالعود لو تعرفي اي واحدة سودانية عندهم كنوز طبيعية اشتري منها، او ممكن كريم جسم تكوني متعودة عليه، ماتستخدميش اي حاجة جديدة عن اللي متعودة عليه عشان مايجلكيش حساسية غير متوقعة، (ده روتين يومي عامة) منتجات bath & bodyworks هايلة

١١- لو انتي بيجيلك حساسية خدي دواء الحساسية قبل النزول و خلي معاكي حباية في الشنطة، تأكدي انه مش من النوع اللي بينيم لو انتي هتسوقي

١٢- خلى معاكي مناديل في شنطتك (بردو روتين يومي) خلي معاكي وايبس

١٣- اشربي عصير برتقال او جوافة او مانجة قبل ماتنزلي و من غير ليه

١٤- كل الروتين ده المفروض انه بيساعدك تكوني على طبيعتك مش متعكننة، لانه الهدف انك يبقى عندك استعداد تسمعي و ماتشتكيش

١٥- لازم تبقى عارفة انتو رايحين فين، جوجل او فيسبوك سيرش المكان اللي هتروحوه عشان تعرفي طبيعته و طبيعة اللبس اللي هتلبسيه في المكان ده، اوعي تختاري المكان، خليه هو يختار عشان تعرفي ذوقه، لو قعد يصمم انك تختازي المكان، فده غالبا لسة نونو، الغي الديت تماما و حطيه عالبلوكد ليست. لكن لو اختار مكان مثلا و ماعجبكيش او طلع بعيد عليكي وقتها بس ممكن تقترحي مكان اخر

١٦- ما تأفوريش في اللبس لانه هو نفسه ممكن يجي كاچوال، بلاش الوان فاقعة، افضل حاجة الكارديجان او الشال عشان تقلعيه لو حر و تلبسيه لو برد. بلاش لبس ضيق زيادة عن اللزوم عشان ترتاحي في القاعدة و الحركة. اول ديت لازم صدرك يبقى متغطي نسبيا، من غير ليه هو كدة

١٧- بلاش اكسسوار اوفر او حلقان طويلة، لو هتلبسي اكسسوار مأفور تبقى قطعة واحدة فقط يا اما سلسلة مأفورة و حلق صغير يا اما حلق كبير و مافيش سلسلة او سلسلة صغيرة بدون عُليقة، او طقم يكون بسيط جدا يا حبذا لو فضة بسيط، الهدف انه الطرف التاني يبقى مركز مع شخصيتك مش مع بهرجتك

١٨- اقفلي كل النوتيفيكشنز على التليفون بتاعك، واتساب و فيسبوك الخ الخ ، الهدف انك تركزي معاه مش مع الموبايل بتاعك

١٩- عرفي صديقتك انتي مع مين و هتكونوا فين و اديها رقمه كمان، خليها تتصل بيكي اول ما توصلي و بعد ساعتين، عشان لو احتاجتي تمشي تقدري تستأذني بشياكة، ممكن كمان صديقتك تعدي عليكي تاخدك لو وراكم مشوار بعده، مش غلط بس المهم ماتقعدش معاه، لانه الهدف انك تركزي معاه و هو يركز معاكي و كمان انتي عندك شخصيتك اللي تقيمي بها مش محتاجة تقييم صديقتك من اول ديت

٢٠- خلي معاكي توكة في الشنطة لو احتاجتي تلمي شعرك (روتين يومي)

٢١- ماتاخديش معاكي مكياج في الشنطة لانك مش هتدخلي الحمام ستين مرة تظبتيه الا لو ماعندكيش ثقة بالنفس و دي لوحدها مشكلة

٢٢- مش محتاجة تحضري الكلام اللي هتقوليه لانه من ناحية انتي المفروض هتسمعي اكتر ما هتتكلمي، و من ناحية اخرى انتي مش رايحة تكذبي عليه في حاجة، لكن لو سألك اسئلة لسة بدري على اجابتها، خليكي مستعدة بجملة مثل "مش حاسة اني حابة اتكلم في الموضوع ده دلوقت"، "ممكن مع الوقت لما نعرف بعض اكتر نتكلم في الموضوع ده باستفاضة"

٢٣- الاهم انك رايحة تستمتعي بمعرفة شخصية جديدة و تعبري عن نفسك بلطافة، لو في اي لحظة حسيتي ان في عكننة اخلعي، اتصلي بيه قبل المعاد للتأكيد عليه، لو ماجاش في معاده و ماتصلش يقول انه متأخر في زحمة المواصلات، اقفلي تليفونك و سيبيه يدب المشوار عالفاضي، ردي عليه بعدها باسبوع لو لكي مزاج

----------------------- اكسجين مصر :اسعى لاثبات الحقائق المجردة فهذا ما تقضيه امانة الكلمه