كتب محمد عنتر عن تجربته أثناء مرض والدته بسرطان الغدد مع مستشفى 57357 بعد ما نشر على مواقع التواصل الإجتماعى بمناسبة الفيديو اللي منتشر على الفيسبوك بيهاجم مستشفي 57357. احب اشارك مع حضراتكم الموقف الوحيد اللى احتكيت فيه بالمستشفي. سنة 2010 والدتى ربنا يشفيها كانت مريضة سرطان غدد ليمفاوية وكانت الحالة متأخرة جدا. كل اسبوع كنا بناخد جرعة كيماوى .. كان الدكتور كاتبهالنا.. عشرة ادوية بيتخلطوا بترتيب معين وبيتعلقوا في محاليل. الجرعة الواحدة كانت بتكلفنا عدة الاف جنيه بس ماكانتش دى المشكلة. المشكلة كان دوا ب 35 جنيه تقريبا .. عمري ما هانسي اسمه فنكرستين كنت بالف على الاخ ده بال10 ساعات كل يوم على رجلي لحد ما الاقي علبة ولا اتنين. وفي مرة قلبت الدنيا علي علبة مافيش فايدة ... كل الصيدليات كبيرة وصغيرة مافيهاش .... كل المستشفيات بترفض تبيع الادوية وتطلب انها تدخل المستشفي الاول ويعملولها تحاليل وعينات "بعشرين تلاتين الف جنيه" وبعدين يدوها الجرعة باسعار المستشفي. في وسط الانهيار ده وانا في الشغل قولت اتصل بمستشفي 57. موظفة الاستقبال كانت متعاونة جدا .. وفي لحظات حولتنى لواحد اسمه الدكتور شريف. الراجل فضل ربع ساعة يهدينى ويطمنى واخد موبايلي ووعدنى يكلمنى في اقرب وقت الحقيقة انا توقعت حاجتين: الاولي ان شريف ده دكتور صغير لانه كان متحمس قوى وضيع معايا ربع ساعة فى التليفون. التانية ان جملة هاكلمك في التليفون دى بديل مهذب لكلمة لأة. وبعد ربع ساعة جالي اتصال من دكتور شريف بياخد عنوان البنك علشان يبعتلي 3 علب من صيدلية العزبي فرع القصر العيني ديلفري "سبق واتصلت بالعزبي وقالوا مش موجود" وخلال نص ساعة كان الدواء في ايدى. بالصدفة البحتة عرفت بعدها ان اللي كلمنى ده يبقي دكتور شريف ابوالنجا مدير المستشفي شخصيا. خلص الكلام بالنسبة ليا.
-------------------- اكسجين مصر :اسعى لاثبات الحقائق المجردة فهذا ما تقضيه امانة الكلمه
0 تعليقات
أكتب تعليق على الموضوع