شهد بنت المدابغ ، تدافع عن الحاضر و تحلم بالمستقبل :
............................................................................
منطقة المدابغ و التى قررت الدولة إزالتها خلال عاماً و نصف ، هذه المنطقة بها مواطنين بسطاء ... نعم و لكن أصحاب حقوق أصيلة فى وطن يضمهم و لا يُشردهم .
( شهد ) طفلة فى الصف الخامس الإبتدائى من قاطنى منطقة مصر القديمة بمجرى العيون و بالتحديد المدابــغ ، الطفلة رغم حداثة سنها فهى تملك عقلاً كبيراً و أملاً فى حياة أفضل ، تريد أن تحيا بكرامة و لا تُحرم من التعليم .
إلتقتها كاميراتنا فلم تضطرب و لم تهرب منها الكلمات ، بل ظلت ثابتة تشرح مطالبها و إحتياجات أهل منطقتها ، فكان لنا معها هذا الحوار العفوى :
- عايزة تقولى أيه يا شهد و بتوجهى كلامك لمين ؟
* مينفعش العيشة اللى عايشينها دى المفروض نبقى أحسن من كده ، و بوجه كلامى للرئيس السيسى ، إحنا غلابة ميرضكمش نبقى فى الشارع و نبقى من غير مدارس و لا نتعلم .
- أيه المشاكل اللى بتواجهيها يا شهد و أنتى من منطقة المدابغ ؟
* سكنين فى البيت فوق و شغلنا تحت و عايزين يهدوا بيوتنا و إحنا فقراء و كده هنبقى فى الشارع
- إنتى فى سنة كام و بتروحى المدرسة و هل بتواجهك مشاكل ؟
* انا بروح مدرسة و أنا فى سنة خامسة إبتدائى و مبتواجهنيش مشكلة فى إنى بروح مدرستى .
- طيب أيه المشاكل اللى بتواجه الناس بوجه عام ؟
* حرام يهدوا بيوت الناس الغلابة و الناس عايزة تشتغل مش نزود البطالة و ننقص الدخل القومى بعد ما تبطلوا الناس عن العمل .
- رئيس الوزراء قال إنه هيزيل منطقة مجرى العيون بعد 18 شهر ، و الحى بيقول إنه هيزيلها دلوقتى ، تقولى لهم أيه يا شهد ؟
* ازاى يشيلوها و فيها ناس طيبين و على قد حالهم و ابويا هنا من و هو عنده 6 سنين و كمان اعمامى هنا من و همه صغيرين .
- شهد كلمينا كده عن يومك هنا من الصبح لآخر النهار ؟
* بصحى الصبح بروح المدرسة و أرجع و أنام شويه و أصحى أقعد على الكمبيوتر و كده يعنى .
- شهد إنتى بتابعى الأخبار ، شايفه الوضع أصبح أفضل بعد وجود الرئيس السيسى رأيك أيه ؟
*حرام إننا نتشرد فى الشوارع و منلاقيش سكن و فى غيرنا عايزين فلوس و مال و غيرهم فى الشارع .
- هل موجود بلطجية فى المنطقة بالليل ؟
* لأ ... مفيش بلطجية ، كل الناس بيشتغلوا غفر و حُراس و الناس غلابة و كل واحد بيساعد التانى و اللى معاه بيساعد اللى ممعهوش، و مفيش بلطجية .
- طبعاً كنتى صغيرة ساعة ثورة يناير ، لكن أيه اللى كنتم بتعانوا منه الفترة اللى فاتت ؟
* الفترة اللى فاتت الناس بتعانى من إن مفيش أمن و لا أمان أيام مرسى ، و مكناش بنعرف نشترى أكلنا و كله بالغالى و مبنعرفش نشتغل و لا نجيب حاجة .
- تعرفى تكلمينى عن الماكينة اللى هناك دى ؟
* الماكينة دى بتفرد الجلد ، و الريحة وحشه بس إحنا إتعودنا على الريحة دى .
- الحياة هنا صعبة ، طب نفسك تبقى أيه ؟
* نفسى أطلع مضيفة طيران أو ضابطة .
- طب إنتى شايفة إن المكان و المنطقة ينفع يطلع منه مضيفة طيران ؟
* بصراحة ده مكانى و بحبه ، بصراحة مينفعش يطلع منه مضيفة ، بس ده مكانى و بيئتى اللى متعودة عليها و المفروض يأهلونا أكثر من كده .
- تقولى أيه للرئيس السيسى فى جملة واحدة ؟
* تحيا مصر
كان هذا هو حوارنا مع طفلة المدابغ التى رغم حلمها الكبير لنفسها بأن تُصبح أفضل مما هى عليه الآن ، إلا أنها تعود لتؤكد على تمسكها بمكانها و بيئتها التى ولدت فيها و نشأ فيها والدها و ذويها
الطفلة الصغيرة جاءت بالقول الفصل فقالت ( إحنا المفروض نتأهل اكثر من كده ) ، لقد أتى الحل على لسانها دون دراسات و لجان و إجتماعات و مناقشات و خطط .
ألا يستحق أهل هذه المنطقة القديمة فى الزمن و الفقر أيضاً أن ننظر لأهلها بعين الإعتبار ، إنهم بشر و ليسوا قطعاً من شطرنج لنُحركهم على هوانا ، إنها حياة بشر تلك التى ترتبط بمجرد ( جرة قلم ) ، هل أصبح الإستئصال أسهل من العلاج ؟
... أهلوهم يرحمكم الله ...
-------------------- اكسجين مصر :اسعى لاثبات الحقائق المجردة فهذا ما تقضيه امانة الكلمه
0 تعليقات
أكتب تعليق على الموضوع