(تحقيق) المطلقات والمجتمع الشمال ... لماذا يعامل المجتمع المطلقة وكأنها من بنات الليل ؟

صورة من جوجل

كتب: شهرزاد الثورة

المطلقات والمجتمع الشمال ... لماذا يعامل المجتمع المطلقة وكأنها من بنات الليل ؟ لماذا يتحول الرجال حولها لذئاب تحاول استغلال انكسارها وضعفها ؟؟ مطلقة : اخواتي الذكور اعتبروني توفيت بمجرد طلاقي علشان يشيلوا من علي نفسهم اي مسئولية تجاهي

المرأة المطلقة فى عيون المجتمع ... ضحية تجربة فاشلة وسوء حظ ولا فريسة سهلة وطائر مذبوح يحاول البعض استغلاله ... ليه ممكن تبعد عنها صديقتها بعد الطلاق ؟؟........ ايه اللى بيفرق فى نظرة المجتمع ليها وليه بيتم التضييق عليها من اهلها ؟؟ ايه يخليها تقدر تواجه كل دة وازاى تساعد نفسها فى التخلص من حالة العجز والضعف .......هل المجتمع بيساعدها ولا بيستغل ظروفها ... ازاى تكون أقوى وتواجه .. دة الموضوع اللى ناقشناه مع اتنين من المطلقات وعدد من الرجال والشباب وكانت البداية مع المطلقات أكسجين : الطلاق فى حد ذاته تجربة مريرة بس احيانا الإستمرار فى الزواج يشكل المرار الأصعب ..... إلى اى حد الطلاق ممكن يكون هو الأختيار الأمثل ؟؟

نورا عفيفى : الطلاق بيكون هو اختيار الامثل لما تفشل كل الحلول ولما تمر بيكي سنوات كتيرة وانتي بتحاولي تنجحي العلاقة دي ومفيش فايدة وخصوصا كمان ان في اولاد فبيكون اختيارك للطلاق صعب ولكنه الافضل من وجهة نظرك علشان نفسك وعلشان اولادك لا يفقدوا الاحترام ليكي وللاب من كثرة المشاكل والاهانات المتبادلة ما بينا كأزواج

صابرين : مفيش شك طبعا ان الطلاق تجربه مريرة خاصه لم تكونى عايشه فى وسط مجتمع شرقى ولكن ايضا 

الزواج احيانا بيكون وصل لمرحله انه لازم ينتهى وقتها البنت مش بتفكر فى اى حاجه ممكن تتعرضلها فى الطلاق هى بتفكر بس ازاى تنهى علاقه زواج سببتلها متاعب وألم نفسى وطبعا ومتكنش متخيله إن الطلاق ونظرة المجتمع ليها وحتى اهلها هتكون قاسيه وبما انها أنثى فهى دائما فنظرهم هى الغلط

أكسجين : عن نظرة المحيطين بالمرأة المطلقة بيشفوها ضحية ولا فريسة سهلة ........هل بتتأثر معاملة الناس معاها ؟؟ ما بين نبذ البعض ومحاولة الإستغلال من البعض ؟؟!

نورا عفيفى : المجتمع بينقسم نصفين ، نصف صريح بيتعامل مع المطلقة من اول لحظة علي أنها فريسة سهلة ومحتاجة لراجل والنص التاني بيصطنع انه بيعاملها علي انها ضحية وبعد فترة بيظهر وجه الحقيقي في استغلالها، المجتمع عندنا بيعامل بنت الليل افضل من المطلقة علي الاقل بنت الليل عارف انه هياخد منها حاجة وهيديها حاجة تانية في المقابل انما المطلقة بيتعامل معاها علي انها هي المحتاجة وهي كمان اللي تدفع

صابرين : طبعا منقدرش نعمم ولكنها بتختلف من شخص الى اخر حسب اخلاقه ومدا ثقافتوا ولكن فى معتقد الحقيقه راسخ عند كل (شاب) مصرى الحقيقه ان اى بنت مطلقه هى سهله بتختلف بقى من رؤيه لرؤيه وبرضو كل واحد بيشوفها من جهه بس المتفق عليه انه دايما الرجال شايفينها سهله وممكن توافق بعلاقه حب او زواج عرفى مثلا او صحوبيه تحت مسمى التحرر فى النهايه كلهم عندهم نفس المعتقد

محمد خير الله : عندك نوعين من المطلقات واحده ضحيه جوزها او اهله وواحده سيئه المعامله والاخلاق وطبعا الاولى تستاهل كل رعايه وحنان وعطف والتانيه لازم الكل يبعد عنها وانا اعرف واحده من النوع التانى اتجوزت 3 مرات وكانت بتصاحب كل اللى اتجوزوها وهى على زمه اللى قبله

أكسجين : تفتكر النوعية دى هى اللى بتسوء سمعة المطلقة وتدى دافع لإستغلالها

محمد خير الله : طبعا وعلى فكره النوعيه دى مشكلتها الكبيره انها عايزه كل اللى حواليها حياتهم تفشل علشان متبقاش هى لواحدها والشخصيه اللى بكلمك عنها بتحاول تخرب لى حياتى شخصيا

ميدو المصرى : أنا شايف أن المجتمع المتخلف اللى عايشين فيه لازم يولع بجاز ولازم تتنسف كل خزعبلاته وتشويهه المتعمد للمرأه المطلقه

فى المقام الأول النظره للموضوع برمته غلط وليه بنقول عليها معرضه للضياع ولازم ننتشلها أنا شايف أنها أنسان قبل ماتكون أنثى وفريسه زى ما كتير بيتصوروها ومن حقها تختار وتفشل وتختار وتفشل وتختار وتنجح وتخوض تجربتها ولما تلاقى نفسها كارهه حياتها .. أيه المشكله أن الأنفصال يحصل بمنتهى الشياكه والود من الطرفين

من غير ما تتحول لقضايا ومحاكم وكوارث . بالعكس حتنتهى الحياه وتبدأ حياه تانيه وتنتهى نغمة أنا عايشه عشان العيالودة اللى حيكون حجر عثره أستقلالها المادى وأظن لو متعلمه أكيد حتقدر تشتغل وتعتمد على نفسها وبعدين المطلقه زى ماهى عرضه للغلط .المتزوجه أيضا عرضه للغلط بل المتزوجه أكثر بدون الخوض فى تفاصيل والأرمله وبنت البنوت كمان

لازم المفاهيم تتغير ومش هيحصل ألا بالوعى والتعليم والأرتقاء بهم

أحمد : المطلقة إنسانة أخطأت فى إختيارها الأول والإنسان يخطئ ويصيب ويتعلم أو مظلومة ويجب جبر كسرها من المحيطين بها لفترة حتى تتعافى وتصبح سوية ومتزنة من جديد لإستقبال شريك أحسن وأفضل يعوضها خسارتها أو ظالمة ومخطئة فى حق زوجها المطلق ودى مش محتاجة أى مما سبق ذكره

أكسجين : ازاى المطلقة بتواجه الحياة مع اهلها فى وضعها الجديد ؟؟ وما يسمى بكلام الناس وقائمة المحظورات و الممنوعات ؟؟

نورا : في نوعين من الاهل ، اهل بيقفلوا علي بنتهم ويمنعوها من الخروج مع اصحابها والنت والتليفونات الكتيرة واحيانا يسمحوا ليها بالشغل علشان متطلبات الحياة وده بيكون تحت اشرافهم ونوع تاني من الاهل زي اللي حصل معايا ان اخواتي الذكور اعتبروني توفيت بمجرد طلاقي وقالوا للناس كده وده علشان يشيلوا من علي نفسهم اي مسئولية تجاهي

صابرين : ازاى تواجه المجتمع واهلها انها تحاول تثبت نفسها وتحقق ذاتها وتثبتلهم ان وجود الرجل فى حياة المراة مالوش علاقة باخلاقها المبادئ لا تتجزا ومع الوقت هتجبر اهلها والمجتمع باحترامها وتقديرها

أكسجين : بعض الرجال يحاول استغلال فترة انكسار وضعف المرأة بعد الطلاق والتحرش بيها فى مجتمع من ذئاب قد تكتشف وجودهم بين اقرب الناس وحتى بين زملاء العمل ازاى تواجه دة ؟؟

نورا : ده لازم هيحصل وهيتكرر كمان علي مدار سنوات مادامت لم تتزوج بعد وانا اضطريت في عملي اني اخبرهم اني تزوجت مرة تانية علشان ابعد عني استغلالهم وقرفهم وفي الحقيقة مفيش روشتة ممكن اكتبها للست علشان تواجه النوعية دي غير ارادتها هي عايزة تكون انسانة جديدة ولا هتفضل تابع طول عمرها وتوافق علي استغلال الرجل لها

صابرين : اكيد طبعا بس دة بيختلف من انثى لانثى لكنا كلنا بلاستثناء عندنا مشاعر ومحدش بيقدر يعيش من غير حب .... و احب كمان انتهز الفرصه لسؤالك وأوضح نقطه مهمه أعتقد الناس فهمها عن المراة المطلقه بانها اكثر احتياجا للحب او بمعنى اصح الجنس ودة الحقيقه من اكتر الحاجات الشائعه فى مجتمعنا لانه اى انثى عندها احتياج لانها انسان عندة مشاعر ومش بس (المطلقه) بالعكس فى ستات بتتعقد من الزواج والجنس عموما بعد الطلاق من مرار تجربتها وفى بنت بتقرر انها تبنى ذاتها وتحقق اهدافها اللى الجواز منعها منها بالتأكيد بتقابل اشخاص مرضى كتير لأنهم من الفئه اللى ذكرتها فى السابق اللى معتقدين بان المطلقه منكسرة او بالبلدى دايما يقولوا ان البنت اللى جربت الجنس متقدرش تعيش من غيره !!! ويبدوا يبنوا بقى خططهم من هذا المنطلق وتلاقى مديرك عينه منك وجارك وبعض الاقارب بس الحق يقال كل واحد وله طريقه مختلفه ما بين اللى عايز يرتبط ويقيم علاقه غير شرعيه تحت مسمى التحرر واننا مثقفين واللى متجوز وعايز يتجوز عرفى عشان مراته متعرفش ! واللى بيحاول يقنعها انه بيحبها بس ظروفة الماديه لا تسمح وبعد فترة من الوقت يبدا بتمهيد لعلاقه جنسيا اعتبارا انها مدام ومحدش هيعرف

أكسجين : ايه اكتر حاجة تساعد المرأة على استعادة ثقتها بنفسها ؟؟ وامتى تقرر الدخول فى تجربة عاطفية او زواج جديد ؟؟

نورا : تقرر الدخول في تجربة عاطفية وزواج جديد لما تلاقي نفسها مستعدة نفسيا ومعنويا ومش هتنكسر المرة دي علشان مش هتتخلي عن شغلها واحلامها علشان خاطر رجل ، لما تبقي معه علي قدم من المساواة وتعرف انها مش كائن ضعيف وانها ممكن تتحمل اكتر من اللي بيتحمله الراجل.. وتخلى معظم اللي هتقابله بعد الطلاق نظرة المجتمع ليها علي انها ست شمال وعلشان تتخطي ده لازم يكون عندها قدرة كبيرة من السيطرة علي نفسها والسيطرة علي اعصابها وانها دايما تكون عارفة ان العيب في المجتمع مش فيها

صابرين : اكتر حاجه تساعدها على استعادة ثقتها بنفسها هى انها ترمى كلام الناس وراء ضهرها وتبعد عن أى حد بيستغلها وتشتغل وتقرا وتعمل الحاجه اللى هى عايزاها وبتحبها 

هل ممكن صديقاتها واقاربها يبعدوا عنها خوفا على ازواجهن ؟؟ موضوع ان ممكن صدبقه تبعد عن صحبتها خوفا على زوجها ؟ دى مؤكد بتحصل كتير فى نماذج شفتها انما دة بيرجع برضو للبيئه اللى عايشين فيها ومدى ثقافة مجتمعها وانا الحقيقه شخصيا كنت بتجنب انى ازور صحباتى المتزوجات بعيدا عن المشاكل او الشك حتى لو مهما كانت اعز صديفاتى

أكسجين : عندك كلام تانى تحبى تقوليه فى الموضوع دة ؟؟ 

نورا : مش عارفة ممكن اقول ايه بس تجربة الطلاق مش سهلة خالص في مجمتع دايما شايف الست انها اداة للمتعة وفريسة سهلة ودايما بانصح صديقاتي المتزوجات انهم يتحملوا ظلم الرجل اللي معاهم لانه علي الاقل اهون من ظلم مجمتع كامل وانها دلوقتي ان كانت بتشتكي من معاملة او اي شئ من شخص واحد فبعد كده هتلاقي الاهل والاصحاب والجيران والكل بيعاملها علي انها رخيصة

صابرين : ايوة عايزة اتكلم بوضوح اكتر وللاسف نظرة الناس ممكن تقل لكنها مبتتغيرش والمجتمع فى تاخر وجهل وبيزداد تخلف يوم بعد يوم للاسف هما اهاليهم ربوهم على كدا واجدادهم ايضا والكلمه الشهيرة دايما المطلقه دى يعنى اخلاقها مش كويسه وهى ازاى عايزة تقنعنا انها قادرة تعيش من غير راجل ؟! وبينسوا يسالوا هى ازاى قادرة تعيش مثلا بنفقه بسيطه لا تذكر او مرتب من شغلها او هى ازاى قادرة تعيش مع اهلها واخواتها فى بيت لا يتسعهم للاسف مفيش تفكير عندهم غير الجنس الجنس واذا لبست زى البنات تبقى عايزة تصطاد عريس او هى رايحه مكان مش محترم واذا اتاخرت تبقى كانت مع حد انتى مطلقه مطلقه عارفه يعنى ايه مطلقه يعنى مينفعش ومينفعش ومينفعش اة نسيت كمان انك مينفعش تختارى لم تيجى تتجوزى لانك مطلقه احمدى ربنا ان حد بص فى وشك حتى لو مهما كنتى جميله وصغيرة وحتى لو العريس دة اقل منك فى كل حاجه بس انتى اقل من اقل حاجه انتى مطلقه يعنى كسر او خرج بيت زى ما بيقولوا علينا

اتكلمنا مع حالتين لمطلقات وتناولنا اراءهم وبعض اراء من متابعى موقعنا وطرحنا عليهم اسئلة واليكم بعض التعليقات التى تلقيناها 

أكسجين : فرصة المطلقة فى الزواج الثانى محاطة بالمخاطر من ناحية الأهل والناس ... والتحرش بيها بيكون اكبر ...... واختيار البعد عن المجتمع والإنزواء بوحدة اصعب !!!!!!!!!

أحمد : بالعكس الزواج الثانى بيكون إختيار أكثر رشدا والعريس الجديد بيكون بكر كمان ، أنا شخصيا السنة اللى فاتت كنت شاهد ثانى على عقد زواج صديق مقرب بكر تزوج من ثيب وأم كمان

محمد خيرالله : اعرف صديقه عانت مع زوجها 20 عام وكان طبعه سىء اتطلقت وكان معاه 3 اولاد اخدت اصغرهم واتجوزت حد محترم وحياتها بدات بعد 20 سنه وكأنها عروسه جديده

حسام : للمطلقه التركيز فى حياتها العمليه والنجاح فيها وتثبت ان سوء الحظ فى الاختيار هو سبب فشلها

جمال الخضرى : مفيش ست تفكر في الطلاق إلا إذا كانت عارفه انه ليها دخل خاص بيها هتعرف تصرف علي نفسها بعد كده لو معاها تصرف علي نفسها ه تعيش باحترامها بين الناس والمجتمع لو احتاجت لحد هتتذل

محمد شورى : اللي بيفرق مع المطلقة المكان اللي بتعيش فيه وعقلية المحيطين بيها

عادل يوسف : مجتمع متخلف ... جهل وقلة وعى .. وانا على استعداد انى اتجوز مطلقة عادى .. المشكلة مش فى الإنسانة المشكلة فى المجتمع

-------------------- اكسجين مصر :اسعى لاثبات الحقائق المجردة فهذا ما تقضيه امانة الكلمه