بنت كتبت فى أكاونت جديد علشان محدش يعرفها اسرار كانت مخبياها بعد ما كسرت خوف جواها قررت تحكى وتتكلم ورغم انها بتحكى حكايات بنات كتير اتعرضت ليها لكن مكنش عندهم الشجاعة علشان يقولوا اللى اتعرضوا ليه هى قررت علشان تتكلم بحرية انها تقول وتكتب عن طريق أكونت جديد علشان محدش يعرف شخصيتها فقالت اللى جواها بكل صراحة ازاى اتعرضت لحاجات ما كنتش فاهماها ...
دلوقتي هحكي شوية من المواقف المؤلمة اللي اتعرضتلها فاكرة أول موقف حصلي كنت في أولى إعدادي ...مكنتش لسه اتحجبت أه بس أنا بابا طول عمره بيغير علينا أوي وعمره ما يخلينا نخرج بلبس مش كويس أو ضيق ... كنت لابسة بنطلون واسع وتيشرت طويل واسع لسه فاكرة كل التفاصيل بالضبط ... كنت راكبة أوتوبيس وواقفة فيه .. مكنش زحمة وبعدين جه واحد وقف ورايا ومسكني من ورا ...أنا اتخضيت واتحركت كده لقيته استنى شوية وبعدين كمل عادي ..هتقولولي مصرختيش ليه هقولكوا أنا مكنتش فاهمة حاجة ..مش مستوعبة بجد مخضوضة جدا وحاسة إن في حاجة غلط بس مش فاهمة ... وبعدبن افتكرت إنه كان عايز يسرقني ... اه والله فكرت إنه عايز يسرقني ... ساعتها قلت لنفسي كويس إني مش حاطة فلوس في جيب البنطلون ... لدرجة إني وأنا نازلة فكرت أقول للسواق إن في حرامي في الأتوبيس بس حتى دي خفت ومعرفتش أقولها ...مقدرتش أحكي لأي حد ..حتى على الحرامي زي ما كان تفكيري العبيط مصورلي ...وفين بقى بعد ما كبرت فهمت إن ده مكنش حرامي وياريتني ما فهمت ..من ساعتها والموضوع مش بيفارقنى
حاجة مقرفة أكتر من اللي فاتت ....كنت في ابتدائي واعدادي ...اه اصل الموضوع خد وقت شوية وكان حد من قرايبي بيتحرش بيا ...كان شخص كبير مش صغير بس برضه أنا مكنتش فاهمة ايه اللي بيحاول يعمله كل مرة ييجي يسلم عليا فيها كنت ببقى مضايقة أوي ومش طايقاه ..بس مش عارفة ايه ده ولا عارفة أعمل ايه...طبعا مكنش عندي أي جرأة إني أقول لحد أنا خوافة جدا في الحاجات دي وحسيت إني لو قلت هعمل مصيبة وفضيحة في العيلة بسبب الحاجة المجهولة اللي أنا مش عارفاها دي ... فضلت كده لحد ما بطلت أشوف الشخص ده ولما بيحصل موقف وبشوفه ببعد عنه تماما وبعمل كأن مش شايفاه
طول عمري وأنا بخاف اتكلم في الموضوع ده ومبقدرش أقول أي حاجة ولا حتى لأصحابي البنات ، ده حتى دلوقتي بعد ما شوفت كلام شيرين وقد ايه شجعني وشفت كل النوتس المكتوبة.... قررت عشان أتكلم إني أعمل اكونت تاني عشان محدش يعرفني ... برضه خايفة وبكتب وأنا إيدي بتترعش ...معرفش ايدى بتترعش عشان خايفة حد يعرفني يشوف الكلام ده ...ولا بتترعش من كتر الحوادث المؤلمة اللي جت في دماغي فجأة كإنها كانت لسه امبارح.أول هل تعلم عايزة أقولها هي #هل تعلم إن كل كلمة شيرين قالتها للأسف صح وأكتر من كده كمان.
مرة كنت مع أصحابي في الحسين وأنا في ثانوي وكنا كلنا محجبات ولبسنا طويل ومفيش ميك اب والكلام ده وشوية شباب جم يمشوا ورانا وفضلوا يقولوا كلام زبالة أوي واتحرشوا بينا روحنا جرينا دخلنا المسجد وبعد شوية خرجنا لقيناهم واقفين فجرينا على العساكر اللي واقفين أمن عند المسجد وبنحكيلهم لقيناهم هم نفسهم بيقولوا ألفاظ بشعة وبيعاكسوا روحنا جرينا من دول كمان .... رجعوا الشباب دول يجروا ورانا ... روحت لفيت وشتمتهم بصوت عالي راح واحد كتر خيره خلى عنده دم ووقفهم وزعقلهم واحنا ما صدقنا طلعنا نجري وركبنا بسرعة تاكسي ومشينا والكلام ده في الحسين اللي مليان بشر على طول.موقف تاني كنت في الكلية ماشية مع اتنين صحابي وواحد جه في وشي مرة واحدة ومسكني من وسطي وصدري وجري بسرعة ...أنا معرفتش أعمل ايه ...كل اللي قدرت أقوله يا حيوان ... مع إني كده شتمت الحيوان ...وصحابي اتخضوا جدا وأنا من خضيتي لقيت ايديا تلجت وضربات قلبي بقت سريعة أوي وروحت واقعة في الأرض مغمى عليا.كل المواقف اللي فات دي كانت مجرد جزء من الي حصلي باللمس ومش كلها عشان زهقت من كتابتها ...اما لو هقول على الكلام والألفاظ اللي بسمعها مش عارفة هحكي ايه ولا ايه ...دول بيبقوا كل يوم تقريبا ....كلام فيه تعليق على كل حتة في جسمك ...كلام من واحد ماشي في الشارع أو راكب عربية أو حتى سواق التاكسي اللي راكبة معاه.
على فكرة أنا معايا بيبر سبراى وكنت ماسكاه في ايدي مرة وأنا ماشية في الشارع ...عشان يبقى جاهز ... بس لما حصلي الموقف من كتر الخضة اتلبخت ومعرفتش اتحرك ولا أعمل حاجة.بالنسبة للي بيقولوا بقى إن البنات بتتبسط من المعاكسة ...احب أقولهم انتوا مبتفهموش حاجة ولو كانت واحدة هي اللي قالتلكوا كده تبقي هي مريضة فعلا... البنت بتحس إنها مكسورة وضعيفة وبتتمنى الأرض تنشق وتبلعها خصوصا عشان متشوفش الناس واقفة بتتفرج عليها ... البنت بتفقد الثقة بكل الناس وبتمشي خايفة من اي حيوان يعدي من جنبها.وبالنسبة للبس البنات بقى .... مش هقعد أوصف في لبسي وأقول إن أنا وكل اللي حواليا شايفينه الحمد لله محترم ... بس هقول نفس جملة محمد شريف "ان لبس البنات ممكن يكون مستفز بس مش مبرر للتحرش أو انك تاخد مسكة … علشان في ناس كتير بتمشي على رجلها والبي ام والمرسيدس جنبهم وبيستفزوهم برضه بس مابيفكروش ياخدوا لفة … وفي ناس جعانة بتعدي على الجزارين ومنظر اللحمة بيستفزهم ومابيفكروش ياخدوا قطمة" وبعدين بالنسبة بقى للتحرش في التليفونات ولا على الفيس بوك و توينر ولا واحدة سايقة عربية مش باين منها غير ايشارب ولبسها اللي بكم ... ليه ييجي حيوان يزنق عليها بالعربية ويسمعها أقذر الألفاظ ... ولا ييجي حيوان تاني ماشي على رجله ويستهبل ويرمي نفسه قدامها
فعلا البنات فقدت الأمل في الرجولة وفي الرجالة ....حسبنا الله ونعم الوكيل
-------------------- اكسجين مصر :اسعى لاثبات الحقائق المجردة فهذا ما تقضيه امانة الكلمه
0 تعليقات
أكتب تعليق على الموضوع