محمود الحسينى يكتب: مطاراتك يا مصر

مطاراتك يا مصر
........................
1 ) و انت خارج :
ــ تقدر تهرب طيارة جوا الطيارة مش قنبلة ، بس لو غمزت الصول اللى قاعد ع البوابة 50 جنيه ، هايسكت و يصهين و مش هايحط ايده عند سوسة بنطولنك عشان يفتشك .
ــ و انت بتوزن لو معاك وزن زيادة إغمز بـ 20 يحملولك طيارة ع الطيارة .
ــ تطلع طيران مصر للطيران تلاقى سكينة و معلقة و شوكة اتانلس ، فيه ناس بتلطشها ، بس بياخدوا قبلها منك الولاعة .
..
2 ) و إنت داخل
ــ تنزل م الطيارة على طول تلاقى ناس واقفة تنده محمدين ابو جلمبو ، سعيد ابو طاقية ، ما تسألش دول تبع مين .
ــ لو ليك واسطة ف المطار حتى لو عامل نضافة تعدى و شنطتك سليمة حتى لو فيها هيفاء وهبى ، و بتاخد جوازك و عليه بوسة كمان .
ــ لو منتش م اللى فوق هتقف ف الصف و الضابط هيأشرلك دخول و يديك جوازك ، بعديه بخطوتين بالضبط ، بتقف قدام صول كده ، يقعد يفر ف جوازك و تلاقيه ما بيعرفش يقرا ، بتاع إيه ده ؟ ما تسألش هيديك الجواز
ــ لو انت محظوظ و شنطك جات لك ف الاول ، يبقا يا بختك ، و إلا تستنا عامل جايبهم على عربية منين متعرفش ، المهم إغمزه .
ــ و انت واخد شنطك و طالع بره خلاص بتلاقى موظف جمارك بيبص لك من تحت لفوق بقرف حتى لو رايح ع البوابة الخضرا ويفر ف جوازك و لو عجبته بيعديك لو مش داخل نخاشيشه يلطعك ع التفتيش العلنى ، و يفردوا كلوتاتك و شراباتك و بابا غنوجك .
ــ بعد ما بتعديه بتلاقى ناس تقول لك تاكسى ؟ تاكسى ؟ دول مش تاكسى السهرة دول جايين منين ؟ و ليه ؟ و ازاى ؟ مين اللى دخلهم هنا ؟ ف كل مطارات العالم بيبقوا بره اخر حاجة .
ــ آخر حاجة لما توصل للمواقف اوعه تنسا المقشة المصرية الشهيرة بتاعة كل سنة و انت طيب يا بيه ، و يرمى أم المقشة ع الارض و يسند شنطك بصباعه الوسطانى و يقف و يتنح .
.....
ده بإختصار ،،
و نتمنى لكم رحلة سعيدة على متن صفحاتنا ، كان معكم كابتن مهندس طيار محمود الحسينى .
--------------- اكسجين مصر :اسعى لاثبات الحقائق المجردة فهذا ما تقضيه امانة الكلمه