بالفيديو: سجن العقرب كسور فى الحوض والأرجل والركبة والرقبة والفك وجلطة وشلل فى نصف الجسد حصيلة تعذيب 21 معتقل ولم يتم دخولهم مستشفى

ابنة مجدى قرقر

كتب:شهرزادالثورة/تصوير:محمد اكسجين

بنت الدكتور مجدى قرقر تحكى عن مآسى سجن العقرب : سجن العقرب عبارة عن اربع هناجر كل هنجر فيه اربع أجنحة .. الزنزانة فيه عبارة عن متر ونص فى مترين ونص بيكون فيها يا اما سجين انفرادى او 3 مساجين مع بعض بيناموا على سرير فى الأول قبل ما يمسك مجدى عبد الغفار الداخلية كنا بندخل اى كميات أكل وأدوات نضافة شخصية ولبس وعلاج بعد مجدى عبد الغفار اتمنع التريض ودة حق قانونى لهم اتمنعت الزيارة كنا بنروح بنسلم التصاريح تتسرق مننا التصاريح ومترجعش التصاريح من تانى ونتمنع من الزيارة وبنروح لأنهم بيواجهونا بقوات مكافحة الشغب قفلوا الكنتيل والكافيتيريا ودى كانت الوسيلة الوحيدة اللى كان ممكن يجيبوا منها الأكل لأن الأكل ما بيكفيش وفى رمضان كان الأكل عبارة عن نص رغيف عيش ومعاه معلقتين فول انا والدى عنده 62 سنة ومريض كبد وعنده عملية فى العمود الفقرى ومركب شرايح ومسامير وبينام ع الإسفلت لأن مفيش كمان معاه ملابس بسبب ان 

مجدى عبد الغفار لما مسك عمل تجريدة خلالها اخدوا الملابس اللى معاه ومفضلش معاه غير غيار بديل واحد لبس السجن يعنى يلبس لبس السجن لحد ما يغسل الغيار يبدل بين الإتنين ولبس السجن دة طول الوقت مش نضيف أصلا ... و قطعوا عليهم المياة والزنازين أصلا مش واصلها كهربا نهائى وكمان مواسير المجارة اتكسرت واتسربت للسجن لدرجة انهم دلوقتى بيطلبوا علاج علشان الملاريا غير ان مفيش رعاية صحية خالص واحنا بعتنا استغاثات لمجلس حقوق الإنسان وطلبنا من كذا جهة انها تتابع سجن العقرب والنتيجة انهم نقلوا والدى وعدد من السجناء مستشفى ليمان طرة بسبب ان والدى كان مصاب بحساسية وامراض جلدية استمر بالمستشفى 3 اسابيع لحد ما زيارة حقوق الإنسان عدت ورجعوه سجن العقرب تانى طبعا والدى خس 40 كيلوا من وزنه مع سنه دى مشكلة وزاد على كدة ان فى معتقلين بقى عندهم جرب لأن الزنازين مش بتشوف شمس .. أما عن معاملة الشباب فى 

السجون ضرب وتعليق وتعذيب وانتهاكات جنسية بشعة بيظهروا فى الجلسات وشهم مورم ومتبهدل فى سجن العقرب بيتم فيه القتل البطئ الممنهج ففى خلال سنة مات خمس معتقلين منهم فريد اسماعيل وعصام دربالة ونبيل المغربى ومن بداية وجود مجدى عبد الغفار الزيارة بقى مدتها 3 دقايق وقانونا المفروض ساعة وانا من شهر مارس اللى فات مش عارفة ازور والدى والعلاج مش عارفة اوصله له اخدت علاج له 3 مرات يكفى 3 شهور بس والدى بقاله 7 شهور من غير علاج وانا جاية النهاردة بخصوص ان 21 معتقل كان فى اضراب فى هنجرين h3 ,h4 الناس كانت بتطالب بحقوقهم فى الزيارة وخصوصا ان احنا رفعنا قضية بان الزيارة بلا حائل و تكون كل اسبوع لمدة 60 دقيقة واسرة حسن القبانى كسبتها لكن مش بيتنفذ الحكم وان المشكلة ان فى تعذيب فى هنجر h3 ,h4 لأننا 

عرفنا ان الهنجرين دول اتعذبوا بسبب الإضراب ودة عرفنا من ناس كانت فى جلسة وقالوا لنا ان حصل تعذيب لهم وحصلت اصابات منها جلطة فى النصف الشمال من الجسد لواحد اسمه طارق قطب فى قضية كرداسة واصابات تانية زى كسر فى الحوض . انزلاق فى العمود الفقرى كسر فى عظمة الفك وجرح عميق فى الوجه والرقبة قطع فى وتر الركبة ارتجاج فى المخ . كسر فى القدم اليمنى كسر فى الرقبة وفى اكتر من اربع حالات كسر فى القدم كل دة نتيجة تعذيب ل 21 معتقل اللى عمل اضراب بيطالب بحقوقه فى الزيارة ودول اللى عرفنا نجيب اساميهم علشان 

نثبتها فى القضية وطبعا كل ما يحصل حملة على سجن العقرب يزيد بعدها التنكيل والتعذيب بالمساجين المشكلة ان ال21 معتقل دول راحوا المستشفى ولم يتم علاجهم لأن ادارة السجن مش عايزة تثبت الحالات دى وانهم اتعذبوا داخل السجن وان انا مش بطالب بخروهم ولا حتى بخروج والدى رغم ان فيهم ناس كتير ابرياء بس عايزيين حقهم عالجهم اديهم حقوقهم داخل السجن مش عايزة غير حقى انى اشوف ابويا واطمن عليه هو متهم بحاجات ملهاش لزمة ومحدش قدر يثبتها ورغم كدة بقول ابسط شئ انى اشوفه . .. تنويه ....  

الدكتور محمد مجدى على حامد ( مجدى قرقر ) دكتور بكلية تخطيط عمرانى و عمره 62 امين عام حزب اﻻستقلال و برلمانى سابق و قيادى بحركة كفايه تم اعتقاله من منزله ف 2 يوليو 2014 و التحقيق معه ف امن الدوله لساعات ف التجمع الخامس و بعدها انتقل لسجن العقرب ( شديد الحراسه ) تحت قضية 473 حصر امن دوله عليا و المعروفه اعﻻميا " بقضية تحالف دعم اﻻخوان " و التهم : اﻻنضمام لجماعه محظوره و تعطيل الدستور والتحريض ع العنف يعانى من امراض الكبد والقلب وارتفاع ضغط الدم تعرض للأصابة بأمراض جلدية نقص 40 كيلوا من وزنه .. يعانى من آلام بالظهر حيث انه سبق وخضع لعملية جراحية بالعمود الفقرى وتركيب شرائح ومسامير يتعرض لسوء معاملة واهمال طبى وممنوع عنه العلاج منذ سبعة اشهر .


--------------- اكسجين مصر :اسعى لاثبات الحقائق المجردة فهذا ما تقضيه امانة الكلمه