بالفيديو:زوجة المعتقل هانى عبد الستار باكية : هاتوا جثة هانى ادفنه .. هاتوا هانى لولاده التلاتة

كتب:شهرزادالثورة/تصوير:محمد اكسجين
بكت حنان صلاح محمد أمام كاميرا أكسجين مصر وقالت مشكلتى جوزى اختفى من 10/8 اللى فات ومش عارفة اوصل لأى حاجة عنه .. هو شغال حارس عمارة فى ش مكرم عبيد مدينة نصر وكان بيشتغل ساعى فى شركة فى نفس العمارة بس الشركة دى اتنقلت مكان تانى فى شارع السفارات كان بيروح هناك ينضف المكتب من الساعة 12 الظهر ويجى الساعة 4 او خمسة .. فضلت ارن عليه ميردش لحد الساعة 11 بليل و لما رحت سألت عليه فى مكان شغله البواب قالى فى جهة امنية اخدته هو وهشام محمد أحمد الطيب وراحوا قسم أول مدينة نصر دة اللى عرفته 

لكن القسم انكر وجوده فضلت اكتر من 15 يوم ادور عليه فى كل اقسام الشرطة وكل الأماكن اللى ممكن يكون فيها فى سجون مصر كلها والكل بينكر وجوده وبعد 15 يوم لقينا هشام محمد الطيب دة فى سجن الإستئناف وهو كان مقبوض عليه معاه .. فلما رحنا نسأل هشام وكان صعب نقابله هو طبعا اتعمل له قضية واتحكم عليه .. رحنا من خلف شباك الزنزانة وسألناه هانى فين قالنا ان هانى مات تالت يوم من القبض عليه بعد صلاة العشاء وانه مات من  

كتر التعذيب ... طيب لو هو اتوفى هم مخلينه عندهم ليه ؟؟ طب يدونى جثته ادفنه ولو هو حى يقولولى هو فين ؟ ! هشام اللى كان معاه راح محكمة واتعمل له قضية واتحكم عليه هو و8 اشخاص كان مقبوض عليهم معاه .. هانى بقى راح فين ؟؟ فين هانى ؟؟ هانى سعد محمد عبد الستار أب لتلات ولاد اطفال فى ابتدائى . راح فين ؟؟ هاتوا هانى لولاده ؟؟ عياله بيسأله عليه كل يوم ... ولا تتمالك حنان نفسها وتنهار فى البكاء . انا عايزة جوزى لو هو اتوفى عايزة جثته . احنا قدمنا بلاغ للنائب العام ولحقوق الإنسان ولوزارة الدفاع والداخلية ورئاسة الوزراء .. وبعت شكوى لرئاسة الجمهورية اترفضت قالوا مش بنقبل الشكاوى اللى زى دى ..... لما مش هتقبلوا شكوانا نشتكى لمين يعنى هيقبل شكوة مين ... اكتب فى الشكوى ايه علشان يقبلوها ؟؟ انا عايزة جوزى ابو التلات اطفال لو ميت يقولوا فى المكان الفلانى ولو حى يقولوا على مكانه وانطفأت كاميرا أكسجين مصر ولم تجف دموع ضحايا التعذيب فى مصر ولم تطفئ نيران قلوب أمهاتهم .


--------------- اكسجين مصر :اسعى لاثبات الحقائق المجردة فهذا ما تقضيه امانة الكلمه