صاحبة شخصية "ضمير ابله حكمت ". الحقيقية

‏‎Rania Gad‎‏.
ممكن كتير ميهمهوش الموضوع بس انا حبيت اعرض مثل رائع في القياده و القدوه .
السيده اللي لابسه ابيض علي يمين الصوره هي" رضا سلامه" المديره السابقه لكلية رمسيس للبنات حتي سنة 1990 تقريبا , اللي فاتن حمامه مثلت جزء ضئيل قوي من حياتها العمليه كمديرة مدرسه في مسلسل "ضمير ابله حكمت ".
السيده الفاضله دي يا ساده كانت بتربي اجيال من سن الحضانه للثانويه العامه وكذلك المدرسين من قلب مكتبها !!!! قادر تتخيل ان مديرة مدرسه تقدر تسيب بصمات وهي من مكتبها علي 14 مرحله وكل مرحله فيها العديد من التلاميذ؟؟؟؟!!! عارف ان السيده دي كان بيخاف منها الكبير قبل الصغير , المدرس قبل الطالب , حتي اولياء الامور كانوا بيخافوا منها وبيعملولها الف حساب ؟؟؟؟ طيب انت فاكر ان ده كان بسبب قسوه منها او عنف او مجرد جبروت ؟؟؟!!!! لا يا ساده , الكل كان بيخاف منها و يعمل الف حساب للعمل اللي هايقوم بيه علشان عارف ان في قائد بيتابعه ماشي علي القوانين مبيتهاونش , ماشي علي المبادئ لا يتخلي عنها , لا يحيد عن الحق سواء مع موظف او مدرس او طالب وكل الجبروت ده كانت تقابلنا بأبتسامه مهذبه في الطوابير الصباح و في نفس الوقت المدرسه كلها تترج لو هي بتمر في اي مكان .
كانت بتزرع المبادئ و القيم و الاخلاق , بتزرع فينا عنوانك هو اداءك واخلاصك في العمل واحترامك للقوانين , بتزرع فينا الامانه و الصدق و الاقدام و النشاط وحب المعرفه و القياده وقيمة الصديق و التفاني في العمل واحترام الكبير وكل ده كان بيوصلنا من خلال تعاملاتها واحترامها لذاتها وتطبقها هي اولا للقوانين والالتزامات علي نفسها , عمرنا ما شوفناها بتفرق بين مسلمه و مسيحيه ,عمرنا ما حسينا ولا عرفنا يعني ايه مسلم و مسيحي , الاعياد كانت للكل يفرح بيها كريسمس كان او مولد نبوي .
اتخرجنا يا ساده من المدرسه بنات رجاله , تعرف خريجات مدرستنا في اي مكان من خلال اسلوب العمل و الاحترام للذات وللقوانين , واتخرج منا امهات قادة حياة اسرتها بنفس التعاليم .
لا كنا بنعبدها ولا كنا بنمسح لها جوخ لانها ببساطه مكانتش هاتسمح بيه.
انا بصراحه مش عارفه اكفيها حقها , بس يكفيني فخرا انها كانت مديرتي و شكلت كتير في شخصيتي .
رحمك الله , كم كنتي عظيمه , كم اخذتي من ثواب ورا ثواب .
كم انا افتخر اني خريجه كلية رمسيس للبنات بسببك .
مليار تحيه لن تكفيك حقك

------------------------------ اكسجين مصر :اسعى لاثبات الحقائق المجردة فهذا ما تقضيه امانة الكلمه