3 سيناريوهات تنتظر 11/11"ثورة الغلابة"

5

واضح أن الدعوات "المجهلة" للنزول يوم ١١/١١ للأسف تستحق التعليق، ولو كان مجرد تعليق سريع. وبلاش نتجاهل تعبير "مجهلة".. يعني مانعرفش مين وراها. وفيه بس تلات إحتمالات، والتلاتة موجود في خلفيتهم الحاجة اللي كلنا عارفينها.. وهي إحتمالية حدوث إنفجار شعبي بسبب الأوضاع الاقتصادية والاجتماعية في أي لحظة.. بكرة.. أو بعد عشرين سنة. الاحتمال الأول: أن يكون وراها الإخوان أو قطاع منهم. والإخوان ولا هم بتوع ثورات ولا ديمقراطية ولا مطالب اجتماعية حقيقية. والهدف هايكون محاولة ركوب أي تحرك شعبي لمصلحتهم هم. أنت بقة حر.. لو عايز تنزل مع الإخوان إعمل ده. أنا شخصيا مش ممكن أشارك في أي تحرك هم مشاركين فيه، وبعتقد أن بقي فيه ناس كتيرة زيي. الاحتمال التاني: يكون وراها شوية أغبياء وعيال هبلة.. فاكرين أن ميعاد ٢٥ يناير لعمل ثورة ممكن يتكرر تاني. في حين أن الانفجار الشعبي الجديد لو حصل هايحص من المناطق الشعبية والمهمشة وأماكن العمل. مش هايبقي بميعاد زي ما دول متصورين. وهم أغبياء لدرجة أنهم متصورين أن قوتنا تسمح أننا نبتديه أو نثيره. الاحتمال التالت: أن يكون وراها أجهزة أمن ومخابرات - وأنا شخصيا أقرب للاحتمال ده - لأنهم برضوه عارفين أن ممكن يحصل إنفجار في أي وقت، وممكن يكونوا عايزين يجروا الشوية اللي باقيين مننا لمذبحة تكون عبرة، وتكون إستباقية لأي انفجار شعبي، وتخوف الناس أكتر من أي تحرك. وخصوصا أن أخر تحرك حصل في الشارع حصل بخصوص الجزيرتين. وفي تقديري إحنا إنتصرنا فيه ولو نسبيا، والسلطة عارفة ده.. وفعلا الشباب قدروا يتظاهروا، وقدرنا نطلع اللي إتحبسوا.. وقصة الجزيرتين إتعقدت علي دماغ الحكومة. وبالتالي ممكن جدا يكون منطق الأمن والمخابرات.. جرهم لمواجهة يتسحلوا فيها وتخوف الناس وتصحصح في دماغهم مذبحة رابعة. يعني ببساطة "نتخلص من المزعجين ونقطع الطريق علي أي هبة شعبية تلقائية". كل ده لازم نضيف عليه طبعا تعبير "والله أعلم".. ممكن الكلام ده يكون صح وممكن يكون غلط. لكن المؤكد أن لو حصلت حاجة في ١١/١١ هاتكون نتيجتها هزيمة جديدة ودم كتير.

5 ------------------------- اكسجين مصر :اسعى لاثبات الحقائق المجردة فهذا ما تقضيه امانة الكلمه