شاهد الفيلم العبقرى wonder

فيلم wonder

كتب:احمد عاطف
شوفت فيلم wonder...الفيلم عبقرى جدا....بيوصل رسالة مهمة وانسانية وفــ نفس الوقت بطريقة مبهجة مش كئيبة...المهم الفيلم فكرنى بسنة تانية ابتدائى كان عندنا فالفصل طفل كل الفصل كان بيعامله وحش...هو مكنش عنده الحالة اللى عند بطل الفيلم...هو كان كل مشكلته انه استغفر الله العظيم ربنا يعافينا شعره أصفر زى الاجانب وعينيه خضرا😂...وكان متدلع سيكا...فكل الفصل بقى مكنوش بيحبوه مش عارف عشان هو كان أحلى منهم ولا ايه المبرر...المهم كانو دايما يعايروه ويقلوله "يا أجنبى"...واللى كان بيزفه وهو مروح بلهجة ثورية حماسية:"يا انجليزى يا جبان...هنحدفك باللبان"...ومعرفش بردو ايه الشر فـأنه يحدفه بلبان!! 😂🤔

وفيه واحد روش كان بيقوله "يا واد يا حلو" على اساس ان كدا بيشتمه يعنى....المهم انا بقى الواد صعب عليا جدا وقررت أحتويه وأقعده جنبى وأصاحبه ومكنتش بقوله "يا أنجليزى" و لا عمرى حسسته انه أقل منى يعنى عشان شعره أصفر وعينيه خضرا والحاجات المقرفة اللى هو فيها دى😂...وكنت كمان بشرّبه مــالزمزمية بتاعتى عادى لو عطش....مش من بؤها طبعا...كنت بصبله شوية مية فالغطا الصغير بتاع الزمزامية كدا.

المهم فضلنا أصحاب بقى...لحد ما دخلت مرة فالفسحة فـيوم لقيته قاعد فالفصل لوحده وبيقفل السوستة بتاعت شنطتى....طبعا الموقف دا فالابتدائى ومع خيالنا الواسع اياميها...علطول اتصدمت...مهو زميلك بيقفل سوستة الشنطة بتاعتك فـغيابك = كان بيسرقك وش...هو أينعم الشنطة مكنش فيها غير شوية كتب وزارة وقلم رصاص وأستيكة أنا واكل نصها أصلا...الا أنى بكل حرقة وأفورة الطفولة الشهيرة قولتله:(متكلمنيش تانى يا حرامى ومتقعدش جنبى...بتسرقنى!!!)...وقولتها وأنا متأثر جدا ومنفعل زى نور الشريف على أبنه فــمسلسل حضرة المتهم أبى😂...وهو يحلفلى ان شنطتى كانت مفتوحة وهو بيقفلها...بس أنا ابدااااااا.

ونزلت قولت للأبلة انه بيسرقنى...قالتى سرق منك أيه...مبقتش عارف أرد لأنى نزلت بسرعة من غير ما أشوف هو سرق حاجة فعلا ولا لأ😂.. فلما كررت السؤال وحسيت أنى مزنوق...قولتلها:(مقدرش أقولك يا أبلة...مينفعش أفتن على زميلى...الفتنة أشد مـن القتل)😂...الست بقت بتضرب كف على كف مــالهبل بتاعى ومن الواقع اللى أنا فتأته😂.

و اتخاصمنا بقى وراح قعد فمكان تانى والعيال سألتنى ايه اللى حصل قولتلهم بيسرقنى...قالولى شوفت مش دا اللى كنت بتقول عليه مش أنجليزى...فـأنا من غيظتى بقا قولتلهم اني اكتشفت امبارح انه اسرائيلى😂...ولقيت نجمة اسرائيل راسمها على بطنه بالقلم الجاف....وكلهم انبهروا وصدقوا عادى جدا ومحدش سألنى أنا وصلت لبطنه شفتها فين...لاننا كلنا كنا أغبية وبنصدق اى حاجة اياميها...وبعدها بفترة جه يصالحنى فأتصالحت معاه بقى بعد ما قولتله "هصالحك بس بشرط...هفتح سوستة شنطتك وأقفلها زى ما أنت عملت فبتاعتى أه"...فـقالى ماشى ورجعنا اصحاب تانى وحكالى إن العيال بقت بتقوله"يا اسرائيلى" فقولتله سيبك منهم دول سفلة😂😂

فأنا شايف فيلم wonder دا لازم يفرجوه للأطفال يتعلموا منه ازاى يحترموا اختلاف بعض...لان الفكرة مش فمرض أو خلل جينى أد ما هى الفكرة ان المجتمع دايما بيحاول يتجنب الانسان المختلف...يعنى الفيلم دا لو كنا شفناه فالابتدائى كان هيغير مفاهيم كتيرة أوى عند الواحد اياميها أحسن مليون مرة من قصة "سعفان الكسلان" المؤثرة بتاعت تالتة ابتدائى وقتها.
شاهد الفيلم من هنا