يابشمهندس محلب كدا فيه 35 قرش ورا
عرفت إن المهندس إبراهيم محلب قعد مع ممثلى سائقى الميكروباص والتاكسى
اللى هما تم إختيارهم إزاى ما أعرفش المهم وإتفقوا على إن الأجره تزيد 10%
بس جوا المحافظه و5% بين المحافظات ، قولت يابركة دعاكى يامه على الرغم
إن الحكومه غلت أسعار البنزين والسولار إلا إنها واقفه فى ضهرنا ومش هتسيبنا
المهم ركبت أول ميكروباص بعد زيادة الأجره ولحظة لم الأجره السواق بصوت
الجكمان أعذب منه الأجره 2 جنيه يا حضرات ، فرديت عليه من أخر كنبه ورا
وقولته ليه يا أوسطى هى مش الاجره كانت جنيه ونص وبعد 10% زيادة اللى
هما 15 قرش تبقى 165 قرش ؟رد عليا بصوت جكمانى : 10 فى الميه 10 فى
الميه ده إيه مين اللى قال الكلام ده ، بصوت دكتور نفسيه وعصبيه حاصل على
دكتوراه من جامعة كامبردج وزمالة كلية الجراحين وراكب الميكروباص بالبالطو
رديت عليه : مهندس محلب مش إتفق معاكوا على كده ، بصوت جكمانى مضاعف :
محلب محلب مين يا أوزتاز وإجتمع بمين وبعدين هو لسه فيه تعامل ببرايز وشلنات
عشان كل واحد يرجعله إشى بريزه وإشى خمستاشر قرش وإشى خمسه وتلاتين
قرش إنت شكلك هتضيع لنا صيامنا ، قولتله يا أوسطى محلب ده رئيس الوزراء وده
قرار حكومى ولو سمحت انا بعت 2 جنيه إبعتلى 35 قرش الباقى ، هأو إبقى خدهم
من حلب ، فمن هنا من مكانى من الكنبه اللى ورا بقول يا بشمهندس محلب كدا فيه
35 قرش ورا .
رامى زين
0 تعليقات
أكتب تعليق على الموضوع