 |
| ام وليد اقد سائقة تاكسى |
ام وليد اقدم سائقة تاكسى هى ام لأربع اولاد كافحت فى تربيتهم فى غياب الزوج تذكر ام وليد انها تحملت الطريق الصعب وامتهنت مهنة شاقة استطاعت من خلالها الإنفاق على اسرتها وان تزوج ثلاثة من ابنائها وقد توفى احد الإبن الرابع منذ عام تقريبا وقد طلبت ام وليد فى معرض حديثها من الحاضرين قراءة الفاتحة على روح فقيدها ..وبعد لحظات من الصمت تمالكت المرأة الحديدية نفسها وقالت انها تشعر بمتعة عندما تشتغل فى مهنتها فلا تحتاج الى اى شخص وتحافظ على نفسها وتشعر بقوة شخصيتها وكرامتها التى لا تختلف فيها عن الرجل وقالت انا كافحت بعزة نفس وربيت اولادى احسن تربية من غير ما اطلب مساعدة من اخ ولا اب ولا ام ولا جار المتعة ان تعتمد على نفسك وتتحدى اى ظروف والحمد لله انا مازلت بشتغل رغم انى جوزت عيالى وخلفوا واصبحت جدة لكنى ما زلت بشتغل ...كنت ببدأ الشغل من الساعة 6 الصبح لحد الساعة واحدة اروح اراعى امى وابويا واشوف طلبات ولادى واخرج تانى الساعة 4 العصر لحد الساعة واحد بعد نص الليل واحيانا السعة اتنين صباحا حسب الظروف ورزق ربنا ولما اروح اشوف المطبخ وطلبات البيت واشتغل فى البيت لحد الفجر وانام ساعة وبعدين اخرج تانى وهكذا كانت الحياة شقاء بحق ربنا والحمد لله ربنا ساعدنى
ما هو رد فعل جيرانك واهلك على عملك كسائقة تاكسى ؟؟ فى البداية الناس استغربت من جيرانى وكدة والسنة الأولى ليا تعبت فيها علشان الناس تستوعب وجودى حتى ان بعض الركاب كانوا عندما اتوقف لهم بالتاكسى ويشوف السواق واحدة ست يرفض يركب ......وفى مرة وجدت رجل كبير السن وبدقن بيشاور لتاكسى رفض يقف له فوقفت له ولقيت بيقول اعوذ بالله واحدة ست الله يسهلك فصممت ان ارد له الإهانة انت بتقول كدة ليه انا اشفقت عليك من وقفتك ودة تاكسى وعداد وشغلى ازاى تقولى الله يسهلك انا مش عايزة منك حاجة فقالى انتى رايحة فين قلت له انت اللى رايح فين ؟؟ .........ورحت سيباه ومشيت ردا على عدم تقديره ليا
هل كان فى صعوبة انك تستخرجى رخص لمهنة سواقة ؟؟
لا خالص مفيش اى عائق ولا صعوبة
هل كنتى بتتعرضى لأى مضايقات فى الطريق من عربيات او اشخاص ؟؟ لا كان فى امان لحد من ارع سنين فاتوا كنت ارجع الصبح من شغلى عادى دلوقتى مفيش امان وبالنسبة للمرور والكماين دايما تمام رخصى سليمة وماشية مظبوط والناس كلها عرفتنى ما هو رد فعل ابنائك عندما قررتى العمل سواقة تاكسى ؟؟ كانوا صغيرين ومش عارفين حاجة ولما كبروا اتعودا انهم يشوفونى كدة انا خلفت اتنين وربتهم معايا فى العربية والمسألة بقت عادى اتعودوا على كدة اصعب موقف اتعرضتى له فى مهنتك ؟
اصعب موقف كان من 25 سنة ركبت معايا بنت وكنت قبل منطقة الوفاء والأمل فى مكان فاضى وجبل مفيهوش حد شاور راجل كدة قالت لى ركبيه قلت لها انتى تعرفيه قالت لا بس ركبيه ما دام فى طريقنا فركب فى الكرسى ورا وفجأة لقيتها بتفتح الطابلون وهو حاطط سكينة على رقبتى ومكنش فى الطبلون غير 12 جنيه اخدتهم وبعدين طلبت اقله الدهب اللى معايا ومفيش معايا غير خاتم ودبلة قلعتهم وحظها ان الراجل اللى معاها نزل الأول رحت قفلة الباب على رجلها ومسكتها بقت تصرخ وكنا جنب عمارة تحت الإنشاء كدة وصعيدة جم عليا لما سمعوا صراخا قلت لهم ودونا القسم ومحدش يمد ايده انا صاحبة التاكسى ودى حرمية وفعلا رحنا القسم فى مدينة نصر والظابط عرفها وعملها محضر ورجعت الحمد لله بحاجتى وهى رجلها اتكسرت
هل حصل اى اعتراض من اسرتك على انك تكملى فى المهنة دى ؟؟ لا مفيش اى اعتراض علشان مفيش بديل متاح غير كدة واللى معترض يقعدنى ويصرف هو على البيت بس مكنش فى غير كدة وكملت
هل المهنة دى رغم صعوباتها كانت اختيار ام اجبار بالنسبة لك ؟؟ هى الإتنين اختيار واجبار فى نفس الوقت لأن ملهاش بديل واجبار لأنى كنت جايبة العربية بالقسط على البنك فمينفعش اديها لحد تانى علشان عليها اقساط فلازم اتحمل واشتغل علشان اسد اقساطها وإلا هتحبس فبكدة بقى اجبار
رايك فى الطرق والكبارى فى مصر وايه الرسالة اللى توجهيها لأى ست عايزة تشتغل وتساعد نفسها ؟؟ الطرق عايزة تتصلح اكتر وهى فعلا بتتصلح كل يوم ورسالتى لأى ست جار عليها الزمن انها تنزل تشتغل اى حاجة شرط انها تكون بشرف وكرامة فى سبيل الحفاظ على نفسها من غير ما حد يقول انها بتعمل حاجة عيب ولا حرام ولو هتبيع خضار على عربية بشرف من غير ما تمد ايدها لحد امتى تبطلى تشتغلى المهنة دى ؟؟
لآخر يوم فى عمرى هشتغل علشان محتاجش لحد لأن اولادى على ادهم وانا ما اقبلش انى امد ايدى لحد
----------------------------------------------------------------------------------------------------------
0 تعليقات
أكتب تعليق على الموضوع