حراميه الميني باص

كتب : محمد عزت حراميه الميني باص في يوم من الايام وانا راجع من الشغل ومنتظر اتوبيس او مكروباص رخيص إلى حد ما نظرا للظروف الاقتصاديه اللي بيواحد بيمر بها .مش عاوز اطول عليكم، قولوا طول ركبت مينى باص ابو اتنين جنيه وكان زحمه يدوبك قطعت ثمن التذكرة ولسه بدخل جوه العربيه لقيت واحد بيقوم من مكانه ونازل حمدت ربنا وقعدت مكانه وانا عنده فرحه داخليه كده مهي الدنيا زحمه ومفيش حد لاقي حته يركن فيها المهم قعدت وببص حواليا لقيت راجل قاعد ورا السواق بنففرين بيصرخ وبيقول:فلوس الشغل انا اتسرقت الحقوني طبعا كل الناس سألوه فلوس ايه على اعتقاد الناس ان ضاع منه جنيه او عشرة جنيه بالكتيير لكن المفاجأة ان الفلوس تطلع ثلاث الاف جنيه والرجل يشوف تحتيه وجنبيه وفي جيوبه لكن بلا نتيجه فوقف الميني باص ومصمم يفتش الركاب نفر نفر وكان بيقول معلش يا خونا انا لازم اقلبكم واحد واحد دي فلوس الشغل .وبدأ فعلا كل محطه يفتش اللي نازل. وهنا بدأ معدن المواطن المصري والمفتش كرومبو المصري في الظهور والركاب بدأوا يسألوا الرجل اللي اتسرق انت متأكد انك كان معاك فلوس؟ مهو ممكن يكونوا وقعوا قبل ما تركب الميني باص؟ هو في حد كان قاعد جنبك ونزل؟ ورد عليهم انا متاكد ان الفلوس كانت معايا لاني طلعتهم ودفعت ثمن التذكرة منهم ونطق الرجل اللي جنبه وقال انا راكب جنبه من اول الطريق ومتحركتش من مكاني فتشوني راح فتشه ملاقش حاجه طبعا . فبدأ الركاب القدامى يفتكروا ان في اتنين ستات ركبوا واحده قعدت قدامه وواحده وقفت جنبه وعملت نفسها واقع منها جنيه نزل يدور عليه كانت خدت الفلوس من جيبه بخفه يد قبل ما تكمل محطه واحده وقبل ما تاخد التذكرة حتى وطبعا الرجل اول لما افتكر الست ضرب دماغه بايده وقال اخ............. وكل واحد من الركاب بقى يقسم عليه شويه الست كانت ركبه من امام فندق كذاونزلت في المكان كذا واللي يقوله انزل هتلاقيهم هناك بيكملوا سرقه لحد ما الناس اجتمعوا انه يعمل محضر في اقرب قسمويتصل بصاحب الشغل يشرحله اللي حصله يمكن يقسطله الفلوس واول قسم مر بالميني باص كان قسم الازبكيه فطلب الرجل المسروق فلوسه ان اتنين ينزله يشهدوا معاه وبدأ يبص لراكب راكب انا طبعا مفكرتش انزل لسببين الاول :اني مشفتش بعيني حاجه تاني حاجه خفت لو نزلت القسم البس التهمه ويتعمل المحضر فيا مهو اللي بيعمل المحضر عاوز يكمل ورقه المهم اتنين قالوله هننزل نشهد معاك بس فكر هتسدد الفلوس لصاحب الشغل ازاي .
------------------------------------------------------------------------------------------------- اكسجين مصر