( كوكب الصباح ) تشكو من ظلام الإعلامى / أحمد موسى

كتب:امانى محمود-تصويرمحمد اكسجين

الأستاذة / كوكب الصباح واحدة من اللى طالهم ظلم قانون الخدمة المدنية الجديد و هى بتشتغل باحثة تربوية و ناشطة فى الشأن العام .

المهم هى كانت ضمن الموجودين فى الوقفة الإحتجاجية يوم السبت 12 سبتمبر اللى دعى إليها الموظفين والعمال المصريين اللى قانون الخدمة المدنية الجديد هيطبق عليهم ، و أنا بقول ( اللى هيطبق عليهم ) علشان القانون اللى الدولة عمالة تقول إنه قانون حلو و جميل و محصلش ، فى بقى هيئات و وزارات ( كعب عالى ) رفضته و مش هيطبقوه على موظفينهم و عمالهم ، إنما باقى الحرفيش من المصريين شربوه .

الست كوكب الصباح سجلنا معاها فقالت :

- قانون الخدمة المدنية ده مش جديد ده كان عمله الوزير الأسبق / أحمد درويش ( أيام مبارك ) و لما الناس رفضته إتحط فى الأدراج ، و بعدين جه الوزير اللى بعد ده و راح مطلعه من الدرج و فعله فى غفلة من الزمن كده من غير مناقشة و لا أى حاجة .

- القانون ده ضد الفقراء و الغلابة من العمال اللى محدش باصص ليهم بعين الرحمة خالص .

- الوقفة اللى كانت هتبقى عند حديقة الفسطاط كانت وقفة سلمية جداً ، مفيش حد معاه أى حاجة و لا حتى ميكرفون ، لكن اللى الأمن عمله شيئ مخزى جداً خلى الناس تمشى و تلف حوالى 5 - 6 كيلو على رجليهم علشان يشتت المحتجين و نجح فى ده و طبعا كان ضمن المحتجين ستات و ناس كمان كبيرة فى السن ، و كل اللف و المشى ده كان تحت أشعة الشمس و الجو الحر الفظيع ده .

- لما وصل المحتجين بقى لمدخل حديقة الفسطاط ابتدى التفتيش اللى كان فى غاية الغرابة تفتيش ذاتى و كأن الناس جايه تعمل مصيبة مش جيين يعملوا وقفة سلمية ، و كل اللى عملته الشرطة ده بيبعت مشاعر سلبية جداً للشعب اللى دايماً بيقف جنبهم فى أصعب المواقف .

- و بعدين لما المحتجين كانوا فى المكان كان فى حاجة مُلفتة و هى وجود المواطنين الشرفاء و طبعاً دول اللى معروفين فى كل وقفة أو مظاهرة بيظهروا كده علشان يعتدوا على المحتجين و يسبوهم و يتهموهم بالعمالة و أنهم قابضين من الخارج و إنهم خونة و إخوان مع شوية أغانى وطنية مشغلينها و لا هم يفقهوا شيئ فى اللى بيقولوه أو بيعملوه .

-كل الإتهامات دى مع إن الهتافات اللى كان العمال الغلابة بيقولوها جوه الحديقة كلها من نوعية ( ياسيسى إحنا عمال الغلابة مصر أنصرنا على قانون الخدمة المدنية ) و كده و كل الكلام كان فى وجود الشرطة و قدامها .

- نيجى بقى للإعلامى / أحمد موسى و اللى قبل الوقفة بحوالى أسبوع قعد يحرض على المحتجين و يقول نفس الكلام بتاع العمالة و الخيانة و القبض من الخارج ، وكمان قعد يحرض الليلة اللى قبل الوقفة الأهالى و سكان المنطقة اللى فيها الوقفة الإحتجاجية و يقول لهم أقفوا ضد الناس دول لأنهم عايزين يخلوا مصر زى سوريا و العراق و دول خونة و نفس الكلام برضه .

و الكلام لسه على لسان الأستاذة / كوكب الصباح

- و روحنا إحنا و مجموعة من السياسيين و الناس اللى كانوا فى الوقفة الإحتجاجية وناس من نقابة العمال و نقابة الأطباء و تقدمنا ببلاغ للنائب العام إتهمنا فيه احمد موسى بالتحريض ضدنا و بسبنا و بكل الكلام اللى قاله فى التلفزيون عننا و رقم البلاغ ( 16515 ) .

- و أضافت الأستاذة أن جهاز الإعلام هو ما تتهمه هى بالعمالة فهو جهاز يعيق السيسى و يشوه رئيس الدولة ( على حد تعبيرها ) مضيفة أن اللى بيعمله أحمد موسى ده يُعتبر ضد رئيس الدولة شخصياً .

--------------- اكسجين مصر :اسعى لاثبات الحقائق المجردة فهذا ما تقضيه امانة الكلمه