كتب:امانى محمود
الحجاب فرض ... أنا شايفة كده ، لكن مش كل واحد شايف إن كلامى ده صح ، المشكلة بقى إننا لازم نعرف سواء اللى فاهم إنه فرض أو لأ ، لازم كلنا كده نفهم إن الحساب عند رب العالمين و مش من إختصاص البشر .
يعنى كل واحد يخليه فى نفسه و ميحكمش إلا عليها و بس ، و ما يفرضش رأيه على غيره ، لغاية هنا متفقين !؟
فى بقى شيخ دكتور إسمه / مصطفى راشد و هو من علماء الأزهر و معاه دكتوراه فى علم الأديان المقارنة حاجة كده ، و كمان هو خطيب مسجد سيدنى بإستراليا .
المهم فضيلة الشيخ كل ما يسألوه عن الحجاب يقول إن الحجاب ده مش فرض و إن مفيش نص قرآنى بفرضه على المسلمات و كمان مفيش حاجة إسمها البخارى و مسلم ، لأ و كمان قالك أيه إن التراث الإسلامى مليان بالأكاذيب ... شوفت إزاى ؟!
سيبك إنت من أن كلامه ده بخصوص إن مفيش نص فى القرآن عن الحجاب ده كلام طبعاً مردود عليه لأن مش كل الفروض فى عليها نصوص قرآنية ، زى الصلاة مثلاً مفيش نص بيقول صلوا الفجر ركعتين و الظهر و العصر أربع ركعات و المغرب ثلاثة ركعات و العشاء أربعة ركعات .
فهل كده تبقى الصلاة دى مش فرض ؟
طبعاً لأ يا مولانا ...
ندخل على المهم يا مواطن إنت و هو ...
حبينا نشوف الشيخ بيكتب مقالاته و ينشر كلامه فين بالظبط ، فلقينا بقى إن فضيلة الشيخ / مصطفى راشد بيكتب فى موقع إسمه ( سبيل ) و من خلال الموقع ده عمال يقول فتاوى غريبة شوية و منها حكاية الحجاب اللى بقولكم عليها دى .
و هنا بقى مربط الفرس ...
علشان الموقع اللى بيكتب فيه ( سبيل ) مكتوب فيه رقم هاتف للتواصل عادى زى أى موقع دينى و الرقم هو (8843631/ 050 ) و طبعاً الرقم المكتوب ده مش من أرقام شركات المحمول المصرية و لا حتى الأرضى اللى جوه مصر و تحس إنه مش شبه أى أرقام إحنا نعرفها خالص .
حاولنا ندور عن الرقم ده ممكن يكون موجود فين ، و كانت المفاجاة إننا و إحنا بنبص على الموقع لاحظنا إن فى إعلانات زى أى موقع ما بينزل عليه إعلانات بس الفرق إن الإعلانات دى مكتوبة بحروف عبرية ، فطبعاً إستغربنا و دورنا فى إتجاه تانى خالص فإكتشفنا إن فى ثلاث شركات محمول داخل إسرائيل و هى :
شركة سلكوم: برقم 052
شركة أورنـــج: برقم 054
شركة بلفــون: برقم 050
و من اللى فات ده تلاقى إن رقم المحمول اللى موجود فى الموقع تابع للشركة الإسرائيلية الثالثة ( شركة بلفون ) .
طيب معقولة دى ؟
أهو ده اللى واضح لغاية دلوقتى .
و إحنا بنطلب منكم إنتم كمان تدوروا زينا بالظبط و لو أى واحد فيكم لقى أى حاجة تانية غير اللى قولناه ده يتفضل يصلح لنا فوراً ، و إحنا مستعدين نصحح المعلومة فوراً .
بس طيب لو الرقم فعلاً يخص شركة محمول جوه اسرائيل بصحيح
يبقى السؤال هيكون :
أيه اللى يخلى مولانا الشيخ يشتغل فى موقع إدارته جوه إسرائيل ؟
و بعد ما الشك ركبنا من موضوع التلفون أيه المطلوب مننا ؟
المطلوب مننا حاجتين إتنين بس ...
اولاً : نتأكد من حكاية إن الموقع اللى بيشتغل فيه الشيخ موجود بالفعل داخل إسرائيل
و ثانياً : نحاول ندور وراء كل الفتاوى اللى قالها مولانا ده ، و نوزنها كويس إن شاء الله وكمان نسأل فيها شيخ تانى بنثق فيه .
على العموم إحنا دينا دين عقل و بيأمرنا إننا نستخدم دماغنا و منمشيش وراى شخص هو فى الأول و فى الآخر مجرد إنسان ممكن يخطئ و ممكن يصيب
الفتاوى اللى لها طابع خاص و ممكن تألب الناس على بعضها و تعمل مشاكل و ده لأنها مش فى منطقة الرأى الشخصى لإنسان عادى ، لأ ... ده الراجل شيخ و ازهرى و دكتور كمان يعنى رأيه له قيمته برضه .
فى حاجة كمان إحنا مستغربين لها .
الدكتور راشد عضو نقابة محامين زى هو ما كاتب عن نفسه ، طيب شيخ زيه ليه يهتم بإنه يكون محامى ؟
و السؤال التانى اللى موجود جوانا كلنا من أول الحكاية دى ...
هو ليه الأزهر ساكت على الراجل ده و سايبه يستمر إمام و خطيب مسجد سيدنى بإستراليا و ده موقع رفيع على فكرة بين الجاليات المسلمة فى المهجر ؟
--------------- اكسجين مصر :اسعى لاثبات الحقائق المجردة فهذا ما تقضيه امانة الكلمه
0 تعليقات
أكتب تعليق على الموضوع