بالصور: مدير مدرسة ثانوى ينشر صورا له وللمعلمين اثناء تنظيف المدرسة

كتب:شهرزاد الثورة
مدير مدرسة ثانوى ينشر صورا له وللمعلمين اثناء تنظيف وكنس المدرسة وردود افعال متباينة من المدرسين حول هذا السلوك الذى بدا ايجابى لدى البعض وينم عن التفانى والعطاء والإخلاص والإنتماء للمدرسة فيما رآه البعض امتهان لكرامة المعلم وتحميله اعباء لم تكن من اختصاصه تؤثر سلبا على ادائه وتقلل من شأنه فى حين ان الوزارة هى المسئولة عن توفير عمال نظافة للمدارس وتهيئة الجو للمعلم والتلاميذ وخلق بيئة تعليمية صحية واستطلعنا آراء بعض المعلمين من خلال صفحات الفيسبوك الخاصة بجموع المعلمين وكانت التعليقات كالتالى أكسجين : ما تعليق المعلمين على موقف مدير مدرسة ثانوى يقوم بتنظيف الفصول هو والمدرسين بسبب وجود عامل واحد فى المدرسة ؟؟.......... وهل المعلم مطالب بسد العجز فى عمال النظافة ؟؟ هل المدير والمعلمين بما فعلوه قاموا بما هو ايجابى من وجهة نظركم ام سلبى .. مصطفى الحداد : دة تصرف ايجابى شرط ألا يكون فرضا على المدرسين محمود جيزاوى : ده تصرف ايجابى جدا وربنا يجعله فى ميزان حسناتهم رمضان تهامى : طول ما المدير بيخاف من المدير العام ، بيحمل المدرس حصص أكثر من نصابه ، والمدرس بيفرح لأن فصوله هتكتر والدروس هتكتر ، بالتالي المدير العام يعرف إن كله تمام ، ويبلغ المديرية كله تمام ، والمديرية تبلغ الوزارة كله تمام ، وبالتالي لم ولن نتقدم ... مصطفى الحداد : الاداره هى المسئوله عن عجز العمال وممكن يشغلو عمال باليوميه من الصناديق الخاصه بالمحافظه او المديريه رمضان التهامى : لو امتنع المدرس عن أخذ الحصص الزيادة وتركت المدرسة بدون نظافة ، وعلمت المديرية بذلك والوزارة بذلك ، سيتم تعيين مدرسين وعمال وليد هلالى : فعل سلبى طبعا كان لازم المدير يتمسك بحقه فى الحصول على عمال تكفى المدرسه والمدرسين اهانو نفسهم محمد منيب : يافندم إلغاء مكافئه بسيطه لديوان الوزاره يكفى توفير عمال نظافه بس الفساد يدفع تمنه المعلمين أكسجين : هل تعتقدوا ان السلوك دة ممكن يشجع الوزارة على تحميل المعلم كل اعباء العمل بما فيها النظافة والأمن والإشراف اليومى بلا حقوق ولا احترام لإختصاصه ورسالته الأساسية مازن صديق : يا جماعة فى ناس بتعمل كده بحب ناس بتدى من غير متفكر فى مقابل ولا لأ أنا أعرف مدرسين بتدخل تنضف الحمامات كمان أكسجين : محدش ينكر العطاء ولكن لا تنفى مسئولية الإدارة والوزارة فى توفير جو صحى للتعليم وعمال للنظافة لتركيز المعلم على مهمته الأساسية نيفين عمر : لا طبعا... والمعلم يمسك مكنسة ولا شرشوبة ليه بعد ما تعب في تعليمه يشتغل عامل نظافة...وهو المعلم لما بيبقى واقف في الفصل وطالع عينه مين بيساعده... ده انا ببقى عايزة اعمل اذن خروج ومش بلاقى حد يا خد حصة مني احتياطي... يرضي الوزير ان العامل ياخد مني حصة احتياطي؟؟؟ محمد عليان : هم بذلك بيشجعوا على عدم تعيين عمال ٠ فهي غير مفيدة ٠ واقسم ان البلد فيها خير كثير لكن الحرامية اكثر ٠ ٠ على كمال : ده مدير عار وخواف وجبان اعتقد ان لو مدير فى الضرائب او البنوك والمصلحة هتولع عمره ما هيمسح ويكنس احنا اللى بنضيع كرامتنا بايدينا محمد ابراهيم : ده منظره وكسب تعاطف هوماله بالتنضيف ده مابيعملش ده في بيته ان شاء الله مانضفت مدرسين ولاعمال نضافه أحمد حسن : سلبي سيؤثراجتماعيا على هيبة المعلم وانشغاله عن عمله الاصلي تصوري سائق اتوبيس عليه قطع التذاكر ونظافة العربية ثم القيادة هل سيركز وليبقي العامل في بيته وهي شكلية ومجاملة للرؤساء محمود الجغرافى : هذا تطوعا ولكن من المفروض الايستمر هذا التطوع لانه عمل مستمر والمعلم شخص مكلف بعمله ولكن عليه توجيه الطلبة الى أهمية النظافة أكسجين : هل تقبل ان طبيب يسيب المرضى ويقوم بتنظيف المستشفى او موظف بنك ومدير بنك يقوموا بتنظيفه ؟ هل يقبلها قاضى او ضابط ؟؟ فلماذا طلب ذلك الوزير السابق من المعلمين ؟؟ أسامة السرى : موقف سلبى من مدير وصولى يعمل لصالح من ؟؟....... هو المعلم وصل به الحال إلى هذا الإستهزاء احترموا انفسكم وبلاش قلة قيمة سامى حامد : انا لو مكان المدير اسيبها تتحرق عشان اللي في الاداره والمديريه حاطين قدام كل مكتب عامل قاعد علي كرسي ومالوش لزمه وجه المكان ده عشان يشتري دماغه من وجع الدماغ في المدارس .....واللي هعمله هبلغ المحافظ ووكيل الوزاره تلغرافيا ودمتم مصطفى حال : احنا عندنا عامل واحد بس ومعوق كمان والمدرسة كبيرة عليه وبنضطر نلم من بعض ونجيب حد ينظفها على حسابنا من جيوب المعلمين ومفيش ادارة ولا وزارة بتسأل ...... آخر همهم التعليم مش بس نظافة المدارس شمعة الميدان : موقف مطين بطين طبعا ..والله يجيبوا الدكتور ويمسح بلاط المستشفي ولا الظابط ينضف القسم ولا القاضي يمسك الجردل ويطوق المحكمه ..بعدها احنا نمسح الفصول ..انتوا ايه مفيش كرامه كده !!مجرد السؤال فيه اهانه أحمد ابو يارا : موقف سلبى جدا يؤخذ عليهم ولا يحسب لهم ومن لا يُكرِّم نفسه لم يُكرَّم----- سعيد محمد : ده أنا مش بمسك المكنسة فى بيتى أمسكها فى مدرسة ينفع ظابط ولا قاضى ولاموظف محترم يعملها؟!! رنا غنيم : ويبقى فى عجز ليه فى العمال.مالناس غلابه كتير نفسها تشتغل أمل ايمن : ما هو طالما المديرين والمعلمين بيحلو مشكلة عدم وجود عمال هما عمرهم ما هيفكروا يحلوها طارق سليمان : دة موقف سلبى واهانة لكل معلم محمد ابو زهراء : اخى الفاضل يوجد بمدرستنا ثلاث عمال بالاجر والمدرسة كبيرة جداومع ذلك يقوم مدير المدرسةوالمعلمين باعمال نظافه واعمال كثيرة تخص العمال ولكن هذا من باب المروءة والرحمة بهم ولكن بدون تصوير ( اعنى مدير المدرسة الللى مخلى واحد بيصوره وهو بينظف المدرسة ده شغل رياء) رضا عمارة : ثقافة المجتمع هياللي عامله كده فينا اللي بينظف ده انسان متحضر أحمد ابو درهوس : والله تنظيف المدرسة واجب علي جميع الموجودين فيها سواء مدير أو معلم أو طالب أو عامل.وكذلك تنظيف الشارع واجب علي جميع المارين فيه.وكذلك المسجد والمنزل والقطار .ولابد أن نعلم أن نظافة المكان عنوان السكان. ابو موسى : لوسمحتوا اتكلموا بموضوعيه المعلم لو خرج من حصته ونظف الفصل هيضيع مجهوده في النظافه وهيجازي لوفي لجنه وهيضيع وقت الحصه ووقت الطالب علي الاداره توفير عمال ولاهما فالحين في الجزاءات ميدو : ياجماعة فى اليابان المدرس بينضف الفصل كل يوم مع الطلاب .. التواضع ياجماعه وكمان السلوك ده هيقوى العلاقه بين المعلم و الطالب و يزيد الترابط و الحب سومة طارق : موقف إيجابي جداً بس في مدرستي في عجز في العمال المدرسين جايبين ع نفقتهم الخاصة عاملين نظافة وبيجمعوا مرتبهم من بعض فاتن مجاهد : جميل الشعور بالإنتماء للمدرسة والعمل فيها بحب لكن خلط الواجبات وتحديد المسئوليات اهمال يؤثر على كرامة المعلم وعلى دوره فى الفصل .. ايه يخلى المعلم يمسك المقشة فى حين من حقه يطالب بعمال نظافة وجو مهيأ للقيام بعمله دون امتهان لكرامته .... محدش ينكر العطاء وترسيخ قيم النظافة والإهتمام بالبيئة ولكن لا تنفى مسئولية الإدارة والوزارة فى توفير جو صحى للتعليم وعمال للنظافة لتركيز المعلم على مهمته الأساسية

--------------- اكسجين مصر :اسعى لاثبات الحقائق المجردة فهذا ما تقضيه امانة الكلمه