بالصور: نجاد البرعى يكشف حقيقة الهجوم الموجه ضده من قبل اجهزة النظام

كتب: شهرزاد الثورة/تصوير: محمد اكسجين

واجه المحامى الحقوقى والناشط نجاد البرعى هجوما حادا من اجهزة النظام انتهت بملاحقات قضايئة ومنع من السفر ثم تحفظ على امواله فى تطور هو الغريب من نوعه مع شخصية حقوقية لبرالية وعن اسباب هذا الهجوم والملاحقات وتلفيق التهم واسباب غضب اجهزة الدولة على نجاد البرعى اجرت اكسجين مصر الحوار التالى مع البرعى أكسجين : بداية كدة محتاجين نعرف بداية القصة ؟ القصة بأت شوية من بدرى احنا بنشتغل ملفات التعذيب وقدمنا حوالى 100 بلاغ تعذيب للنائب العام ويمكن كمان اكتر من 170 بلاغ تعذيب وفوجئنا انه لم يتم النظر إليها بالجدية الواجبة أو الفصل فيها وكان فى الوقت دة مصر تناقشت مع المجلس الدولى لحقوق الإنسان فى نوفمبر 2014 وصدر عنه عدة توصيات وصلت لحوالى 300 توصية وانتقاد من ضمن التوصيات دى كان وضع التعذيب فى السجون وان مفيش قانون يحجم ويردع هذه المسألة فتصورنا اننا من واجبنا نساعد الحكومة ونساعد البلد فقمنا بعمل اقتراح مشروع بقانون للحد من التعذيب ياخد فى اعتباره الإتفاقيات الدولية اللى هى جزء من الدستور المصرى العادى ولها قوة القانون وفى نفس الوقت نتفادى الإنتقادات الدولية لمصر وفعلا قمنا بعمل لجنة كنت انا ضمنها والأستاذة راجيا عمران والأستاذ أحمد راغب والأستاذ عماد الفقى وفعلا عملنا مشروع قانون لمكافحة التعذيب وكان لابد من مراجعة القانون من الجهات المنوطة بتطبيقه فاستعنا بسيادة المستشار عاصم عبد الجبار نائب رئيس محكمة النقض وسعادة المستشار هشام رءوف رئيس محكمة الإستئناف وهم اصدقاء وبالفعل عملوا تعديلات على المشروع بتاعنا وقننوه اكتر لأن احنا كنا عاملين سقف عالى للحد من جرائم التعذيب وعملنا مناقشة علنية فى فندق بحضور حوالى 30 خبير من خبراء القانون ومحاميين واساتذة قانون وتم اضافة عدة تعديلات بعد المناقشة وبعتنا نسخة من القانون لمستشار الرئيس عبد الفتاح السيسى والمستشار رئيس مجلس القضاء الأعلى وإلى وزير العدالة الإنتقالية وقتها ودة تم فى ابريل 2015 فوجئت فى مايو 2015 برئيس مجلس القضاء الأعلى ابلغ ضد المستشاريت عاصم عبد الجبار والمستشار هشام رءوف بأنهم اشتغلوا مع جماعة غير شرعية اسمها المجموعة المتحدة ضد رئاسة الجمهورية وكرت السبحة بعدها 
أكسجين : مين اللى قدم البلاغ وكان فيه ايه ؟؟ 
اللى قدمه رئيس مجلس القضاء الأعلى وطلب ندب قاضى للتحقيق مع المستشار عاصم عبد الجبار وهشام رءوف بتهمة التعاون مع جهة غير شرعية اسمها المجموعة المتحدة لوضع قانون لمكافحة التعذيب والضغط على رئيس الجمهورية لإصداره 
أكسجين : أليست هذه تهمة غريبة شوية تهمة الشروع فى اصدار قانون ؟؟ 
كل حاجة فى مصر بقت غريبة اصلا احنا بقينا عايشيين فى سيرك 
أاكسجين : هل كنت تتوقع انت والمجموعة المتحدة ان يصدر بحقكم مثل هذا الإتهام ؟؟ 
آه لأن احنا من سنة ونص او من 2011 وفايزة ابو النجا اللى هى دلوقتى مستشار رئيس الجمهورية للأمن القومى معتبرة ان قضية حياتها ومهمتها هى القضاء على منظمات المجتمع المدنى وبخاصة منظمات حقوق الإنسان وقتل حركة حقوق الإنسان وقالت كدة علنا واتكلمت فى الموضوع دة اكتر من مرة وقدمت خمس منظمات دولية للمحاكمة وقالت انهم بيشتغلوا بدون ترخيص واتحكم عليهم بخمس سنين وسنتين وشغالة فى قضية تانية ضد منظمة حقوقية .. فانت عندك دولة ادمنت انتهاكات حقوق الإنسان . حقوق الإنسان انتهاكها اصبح مثل الإدمان اذا تكرر مرة واتنين تدمنه وما تقدرش تبطله ولا تشتغل من غيره وبالتالى اى حد يحاول يمنع دة او يحد منه فبيكون رد الفعل زى المدمن لما تحاول تمنعه عن الإدمان بيكون الرد بالضرب وساعات الأب يقتل ابنه لو حاول يمنعه عن الشئ اللى مدمنه دة وزى ما الإبن يقتل امه علشان بتمنع عنه الفلوس اللى بيشرب بيها مخدرات فالدولة بتعمل كدة بتقتل بتوع حقوق الإنسان علشان مش عايزة حد يقولها ان اللى بيحصل دة غلط وانتى مدمنة تعالى نعالجك أكسجين : ايه مطالب حضرتك بالنسبة للقانون اللى عملته لمكافحة التعذيب ؟؟ القانون دة انا رأيى انه أفضل محاولة اتعملت فى مجال مكافحة التعذيب ولأول مرة تقر ان مأمور مركز الإحتجاز مسئول عن المحتجزين عنده وبتحمله مسئولية تعرض اى محتجز للضرب او التعذيب .. تانى حاجة انها تمنح الحق فى التعويض لمن وقع بحقه التعذيب بمبلغ لايقل عن 200 الف جنيه او 250 الف جنيه أو يزيد عن ذلك لكنه لا يقل عن الرقم المذكور ثالثا انه طالب بوجود شرطة قضائية تابعة للنائب العام بعيدة عن تحريات المباحث والداخلية التى تكون طرف فى قضايا التعذيب 
أكسجين : أيهما اكثر خطورة الإرهاب أم التعذيب فى السجون ؟
الإتنين خاطئين ولا يمكن ان تفاضل بين السئ والأسوأ والتعذيب يقدم وقود من الإرهالبيين الصغار للعمل بالإرهاب والتعذيب فى حد ذاته نوع من الإرهاب وصانع له .. والإرهاب بيجعل اجهزة الدولة تبالغ فى التعذيب والإنتهاكات بزعم محاربة الإرهاب فالإتنين بيعيشوا على بعض ويقتاتوا على بعض ولابد من محاربة جدية للإرهاب والتعذيب فى نفس الوقت وبنفس الجدية 
أكسجين : فى الفترة اللى فاتت حصلت انتهاكات كتير من قبل الداخلية سوار بشكل فردى افراد او ضباط لكن الدولة لاتحاسبهم محاسبة حقيقية ايه رأيك فى الموضوع دة ؟؟
انا رأيى ان كل مشكلات الدولة الساسية تقوم بحلها وزارة الداخلية فالنظام لايعتمد على الأحزاب ولا يثق فيها ولا يقوم بحوارات وطنية جادة ولا يقوم بأى خطوات لإحتواء التوتر اللى موجود فى الشارع السياسى وبيحارب حقوق الإنسان وبيحارب الأحزاب وزعلان من الإعلام كل دة بيضطره للإعتماد على البوليس والشرطة اللى بتلجأ لأسلوب التعذيب


--------------- اكسجين مصر :اسعى لاثبات الحقائق المجردة فهذا ما تقضيه امانة الكلمه