فوزى الرشيدى يكتب : جوليو مش بتاعنا بس ريجينى بتاعنا

فوزى الرشيدى يكتب : جوليو مش بتاعنا بس ريجينى بتاعنا على طريقة فيلم غبى منه فيه وفى مشهد كوميدى للفنان حسن حسنى وهانى رمزى وعند وصولهم كمين للشرطه فيقوم هانى رمزى بإلقاء الفلوس والإحتفاظ بالمطواه لأن المطوة بتاعتهم بس الفلوس مش بتاعتهم . فيقوم جهاز الداخليه بطريقة كوميديه للغاية لكنها كوميديا سوداء ، بقتل 5 أشخاص فى ميكروباص و بيان بأنهم تشكيل عصابى لخطف السياح رغم حسب قولهم أيضاً إنهم خطفوا 9 أشخاص منهم 6 مصريين يعنى مش تخصص سياح !! ، وأيضاً المتهمين يتنكروا فى زى شرطى !! ، يعنى الداخليه عاوزة تنفى التهمه عنها بأن لو حد شاف اللى قتل ريجينى شرطه فهو فعلا شرطه لكن ناس متخفيه أو متنكره يعنى والنعمة مانا دى اوختشى مونى ، بالظبط زى لقطه سلطانية الزبادى لمحمد صبحى مع الطفل فى بيت ام دعبس ع السطوح من مسرحية لعبة الست ، والطفل وشه كله زبادى ومالى وشه واول حرف قاله والله العظيم ما اكلت حاجه من القشطه فرد محمد صبحى والله العظيم؟ دا انت مش اكلت حاجه من القشطه وبس دا إنت دفست دماغك جوه السلطانيه ، بالظبط كده الشرطه ملامح تعذيبها واضحه على ريجينى ويقولك دى عصابه لابسه شرطه . بعد كده تروح الداخليه فى نفس ذات الوقت لبيت المتهمين اللى هما قتلوهم فى ميكروباص فى تبادل اطلاق نار حسب السيناريو ، فيلاقوا شنطة الشاب الإيطالى وجواز سفره والكارينهات وبطاقة الفيزاكارت و3نضارات والتليفون وحتى سماعة التليفون ، وكأن ريجينى كان نازل فى فندق عندهم وشايل الحاجات دى فى صندوق الآمانات وبصراحه العصابه فى منتهى الأمانه قتلوا الشاب واحتفظوا بمقتنياته وأشياءه بصراحه عصابه منتهى الأمانه ، حاجه كده زى الخمر حلال لكن المَزه حرام ، مع إن بمنتهى الغباء ظهور مقتنيات ريجينى أكبر دليل على ان الشاب كان فى الداخليه وأخدوا ماكان معه لأستجوابه كجاسوس وتعذيبه على انه عميل حتى مات فى ايدهم. وكمان حسب البيان إن العصابه تخصص خطف سياح يعنى هيسرقوهم أو بالمصرى هيثبتوهم ويسرقوهم لكن العصابه الأمينة دى إحتفظت بالمسروقات لا وكمان أخدوا رجينى 8 أيام تعذيب وحشى حسب تتقرير الطب الشرعى الإيطالى والمصرى وعذبوه كهرباء فى أماكن حساسه وطفى سجائر فى جسده وضرب بآلات حاده ويقتلوه ويرموه من أجل الإحتفاظ بأوراقه ونضاره وتليفون !!. دى لو عصابة حماده وتوتو هتولع فى الورق وتبيع التليفون والنضاره . الأهم ان العصابه ماتت ومفيش حد نستجوبه خطفتوا الشاب الإيطالى إزاى وليه ورغم إن حسب كلام الداخليه إنهم خطفوا 9 لكن قتلوا ريجينى فقط حظوظ بئى . الأهم أيضاً بعد الفيلم الهابط جدا دا مطلوب من الإيطاليين تصدق مع العلم المصريين أصلاً مصدقوش إلا من بلع برشام منع العقل أو جماعة التبرير اللاإرادى مع أن صعب حتى التبرير فى طلوع الشمس من الغرب . ومن أجل موت الحقيقه ظهرت حقيقه أوضح لكل ذو عقل ، إن من يبحث عن القاتل هو القاتل نفسه ، فى النهايه لكل من يداوى الفشل بخيبه وهبل وفشل أكبر إرحموا مصر التى جعلتم منها مسجل خطر بين الأمم

--------------- اكسجين مصر :اسعى لاثبات الحقائق المجردة فهذا ما تقضيه امانة الكلمه