فوزى الرشيدى يكتب : لؤى فاقد الإحساس المصطنع

مش لؤى بس ياريس اللى محسش بالإنجازات التى لا يراها إلا المقربون من السُلطة
لؤى مش بيشتغل فى الإعلام المقرب ، إعلام آكلى عقول البشر ، ولا مقرب من رجال الأعمال اللى بتصرف على الإعلام دا ولا وافق على بيع تيران وصنافير وجاتله هديه حج لفردين ولا أبوه من رجال الشرطه والقضاه المقربين .
لؤى ياريس هو كل بيت مصرى عايش فى مصر الأسعار زادت عليه والمواصلات دهست أفكارة وآحلامه وهو رايح مدرستة ولا كليته وأبوه بيقبض 1200 جنيه وعنده 3 أولاد عاوز لهم مصاريف دراسة ومواصلات وآكل وشرب وغاز وميه وكهربا وشايف عمه فى الشقه اللى جنبه بيشتغل على أيده يوم فيه و10 مفيش ومقضيها على أد حاله وإن تعب مبيعرفش يكشف وإن كشف مبيعرفش يجيب علاج من غلا أسعاره.
لؤى ياريس محسش بأى حاجه غير فى الإعلام إن فيه سلاح بيجى وقاعده بتتعمل مع إن بناء المواطن أهم بكتير من بناء سلاح لأن المواطن هو الجندى اللى هيشيل السلاح دا ، هاتلى ياريس أى دولة فى العالم متقدمه فى السلاح مواطنها معدوم ؟  ولكن لما تلاقى دولة فيها سلاح ومفهاش حياة تعرف إن قيه جينرالات سبوبة عايشه على تجارة السلاح .
لؤى ياريس شايف  تفريعه بيتعملها حفله على إنها قناه ودولار بيجرى ع العشرين ويوم مايقل قرش بيتعمله حفلة نزول ، لؤى وكل لؤى  اتولد من  1979 حتى 1988 والدولار ب 60 قرش  دلوقت لؤى داخل ع ال 30  والدولار  داخل ع العشرين جنيه  .
لؤى ياريس شايف سد النهضة أوشك على الإنتهاء ومازلنا نردد أصل السد هيقع وماهى إلا أوهام كما الإنجازات اللى مش حاسسها لؤى.
لؤى ياريس شايف ديون كتير على بلده ومستقبل ظلامى وإعلام عامل من البحر الطحينه ونظام وقعنا 43 طيارة لحد  مابيقع فى النكسه ، لؤى يا ريس معندوش حاجه غير بلده ولما شافها بتتباع نزل يحميها إتاخد على المعتقل ولو ربنا بيحبه بيطلع بدفع الإيتاوة علشان يعيش ، لؤى ياريس خايف يختفى قسرى ويرجع لأهلة جثه هامده .
لؤى ياريس خايف يزعل الباشا أحسن ياخد طلقه فى دماغه وتتحسب فرديه أو يرموا جنبه حتة سلاح ويتقال عليه إرهابى منتمى لجماعه فلان وكان بيقاوم السلطات رغم إن لؤى مشفش السلاح إلا لما انضرب بيه .
لؤى مش إخوان ولا عسكر ، لؤى مصرى كان نفسه يحس بالتغير لكن للآسف لؤى مش عارف يكون حساس اصطناعى.
لؤى ياريس طول عمرة شايف طرق بتتعمل وصفقات سلاح بتتعمل وهو لا عندة شركة مقاولات طرق وكبارى يطلعله من الحب جانب من الطرق اللى بتتكسر والكبارى اللى بتقع قبل التشغيل ولا هو تاجر سلاح علشان يطلعله نسبة يبنى بيها مستقبله ولا هو عايش كويس علشان يقدر يشيل السلاح دا يدافع بيه عن أهله وناسه بس شايف أخوه بيموت ع الحدود من الإهمال وكمان أرضه بتتباع .

فى النهاية مش لؤى ياريس هو اللى محسش بالإنجازات لكن الإنجازات  الفظيعه هى اللى محستش بـ لؤى لأن صاحب الإنجازات الفظيعه  مش حاسس بـ لؤى ولا بأى لؤى