المعتقلين وبرد الشتاء فى مصر

صورة من جوجل

واحدة صاحبتنا كتبت بوست تسأل فيه اللي سبق ومروا بتجربة الإعتقال عن الشتاء جوه، هل الزحمة بتخلي الجو دافي؟ ولا حيطان الزنزانة بتجيب سقعة عليهم؟
دي عينة من إجابات البنات اللي ردوا:
- علا رضوان:
" الأرض خرصانة أصلا وبتجيب تلج والحيطان برده خرصانة وبتجيب نفس التلج، ومهما اتغطينا مش بندفى عشان نايمين على الأرض اللى هى تانى خرصانة، والله ماكنت بقدر أمشى عليها وأنا لابسة شرابين عشان أدخل الحمام، ومش بيدخلوا غير بطانية واحدة .. أنا وصحبتى كنا بنحط البطانيتين بتوعنا على بعض ونستغطى مع بعض، وناهيكى بقى عن الإستحمام اللى هو أنا شتاء بس برجع من الجلسة لازم استحمى، بيبقى العربيات قرف وحاجة زفت، كنا بنقفل الشباك اللى هو المنفذ الوحيد للهواء عشان محدش يشوفنا وطبعا الماية ساقعة .. لكي بقى ان تتخيلى فى شهر يناير"
- سارة محمد علي:
"القناطر كانت بحري ما شاء الله والباب مفتوح بطول الحيطه بطانيتين عليه وعلي الشباك بطانيتين برضوا ولا بيأثروا في صواريخ الهوا"
-عائشة الدالي:
"كنا ثلاثه متشردين في زنزانة صغيره من غير حمام البديل (الجردل ) وبجانبه زجاجات مياه ونفترش الأرض والشباك مش بيتقفل والبطاطين مش كتير ..كنا بنشغل السخان اللي بنعمل عليه الأكل يدفينا وكل شويه يفصل ونقوم نعمله ويكهربنا"
- وداد كمال:
"بالاضافة للتلاجة اللى كنا عايشين فيها والنوم على الارض على البطاطين، وكمان المطر ينزل علينا ومنعرفش نقفل الهوايات القريبة من السقف الا بقماش رقيق عشان النفس فى عنبر عدده مش اقل من 22 واحدة او 20 فى الاحوال الاحسن ... بس الحيطان تلج والارض تلج ومهما تضعى من بطاطين فوقك او تحتك انت حاسة انك فى تلاجة .. بس سبحان الله ربنا بيدى الدفا على قدر الغطا .. كنا بناموا عادى .. اما الاغتسال كنا بندفى مية فى الكاتل على الجردل .. وربنا يتقبل ويثبتنا فى زمن الفتن هذه بس لما دخلت التأديب خمس ايام كانت زنزانة مفتوحة بشباك كبير .. المطر نازل عليكى عادى وطبعا بدون اى بطاطين غير واحدة خفيفة جدا بتاعة الجيش الله يحرقة... واخرى سمحوا بيها استثناء اتغطى بيها وكانت قصيرة يعنى لو غطيت رجلى اسقع من فوق ولو غطيت رقبتى رجلى تبقى فى الهوا.. كان شهر ديسمبر والساقعة على اشدها .. بس الحمد لله احيانا كنت بنام رغم الثلج المحيط بي"
- سمية دسوقي:
"فكرتينى بالأيام الحلوة.. أيام التلج فى القسم واحنا هنموت من التلج والمية ساقعة والبلاط بارد والحيطان متلجة والأصعب وقت الاستحمام، أما القناطر فدى على البحرى"
-آية عمر:
"النفس بيدفى آه، بس المشكله إن عشان الزحمة فبتبقى المراوح والشفاطات شغالة طول الليل .. هو عامة ده هزار مقارنة بدش الميه الساقعه فى طووبة .. كهربآ .."
- الشيماء شهيب:
"كانت ليله واحده وف شهر 8...بس متفهميش كنا بردانين ليه..كانت تلج خرسانه ف كل مكان..وفاتحين الباب علينا..يمكن بردنا من الحوع والتعب وعدم النوم لمدة 3ايام وللا العطش..او الخوف...البرد مش بس من الجو"
-آيات حمادة:
"ساقعة تلج وربنا، خاصة لو نايمه جمب شباك من الارض للسقف"
دول 8 بس من كتير اوى سواء بنت او سيدة سبق واعتقلوا خلال ال3 سنين اللي فاتوا، فيهم اللي قضت يومين في الحبس وفيهم اللي قضت سنة واتنين وثلاثة ..
عارفة إنه فيه ناس "زهقت" من الكلام في الموضوع ده، بس أي واحدة ممكن تتاخد في مصر في أي وقت، وهتتمنى ساعتها ما تتنسيش جوه والله..
وإحنا عمالين نشكي من ارتفاع أسعار لبس الشتاء، فيه ناس جوه كل أحلامهم بطانية ولا دفاية حتى .. افتكروهم وادعولهم ..